2024 Ṭau thla ni 18: Naktuk, April 19, 2024 (Zirtawpni) zing dar 7:00 leh tlai dar 5:00 inkar chhunga 1-Mizoram Parliamentary Constituency-a Lok Sabha seat 1 atana inthlan buatsaih tura Lawngtlai District chhunga polling station 181-a inthlan buaipui tur polling party-te chuan vawiin tlai dar 3:58 khan tluang takin an duty-na tur hmun ṭheuh an thleng kim.

Nimina P-2 polling party 116 chuan nizan dar 7:56 khan an duty-na tur hmun an thleng kim a. Vawiina P-1 polling party 65 an duty-na tur hmun pan zingah 37/14-Thingkah polling party-te chuan chawhma dar 11:23-ah an duty-na tur hmun thlengin, thleng hmasa ber an ni a. 38/28-Lungtian-II polling party-te chu mahni duty-na tur hmun thleng hnuhnung ber niin, tlai dar 3:58 khan an thleng fel a ni.

37-Lawngtlai West biala P-1 polling party 37 zingah 37/14-Thingkah polling party chu thleng hmasa berin (11:23 a.m.), 37/3-Hmunlai polling party an thleng hnuhnung ber thung a (3:51 p.m.). 38-Lawngtlai East biala P-1 polling party zingah 38/6-Bazar South polling party thleng hmasa berin (11:30 a.m.), 38/28-Lungtian-II polling party an thleng hnuhnung ber thung (3:58 p.m.).

Heti hian Lawngtlai District-a polling party 181 chuan an duty-na tur hmun an thleng kim ta a. Polling station 181 zinga 20-ah chuan hmeichhe hlangin inthlan hi an buaipui dawn a ni.

Polling party-ah hian polling official 4 ṭheuh, security personnel 2 ṭheuh leh driver 1 ṭheuh telin, Lawngtlai District-a polling party-a inthlan duty tura chhuak zawng zawng hi mi 1,267 an ni a. Lawngtlai District-a sector 27-a sector magistrate-te pawhin an duty-na tur hmun thleng kim tawhin, sector magistrate 27 leh an team-ah an zavaiin mi 81 an awm a. Lawngtlai District-a polling station leh sector bika inthlan duty tura chhuak zawng zawng hi an zavaiin mi 1,348 an ni a. He'ng bakah hian reserve eng emaw zat an la awm bawk a ni.