Vawiin chawhma khan Kolasib bawrsap pisaah District Task Force on Immunization Committee, Kolasib district te chuan Intensified Mission Indradhanush 2 leh Intensified Pulse Polio Immunization Programme kalpui tawh dan enletna leh hlawk zawk a kalpui a nih theih dan tur sawi hona hun hmang.

Pi Sangchhin Chinzah, Chairman, DC Kolasib chuan mitinin hri danna lak an ngaih pawimawh theih nan hri danna lak pawimawhzia an hriatchian hmasak a tul thu a sawi a, Department dang te nen a thawk ho a hlawk zawk a Intensified Pulse Polio Immunization Programme chu kalpui turin a chah bawk.

Vawiin thutkhawm ah hian Dr RK Lalthlamuana, District Immunization Officer hnen atangin kum 2019 chhung a Intensified Mission Indradhanush 2.0 (IMI) leh Intensified Pulse Polio Immunization Programme (IPPI) kalpui dan te ngaihthlak a ni a, January ni 21, 2020 a IPPI kalpui lehna tur a inbuatsaih dan tur te sawi ho a ni. He hunah hian Dr Hmingthanmawii, CMO, Kolasib, Dr Robert Lalfakzuala, DMS, Dr C Lalnunpuia, MO, Kawnpui te leh department hrang hranga member te an tel a ni.

Report a tarlan danin Kolasib district chhung ah Intensified Mission Indradhanush 2.0 thawh khatnaah hri danna pek tur bituk zat atangin naupang zaa 87.32 leh nu naupai zaa za te hnenah hri danna hi pek a ni a, a thawh hnihna ah hian naupang zaa 87.87 leh nu naupai bituk zat 5 a nih laiin 10 hnenah hri danna hi pek a ni bawk a ni. Intensified Pulse Polio Immunization Programme thawh khatnaah hian naupang kum 5 hnuailam 9491 hnenah hri danna hi Booth, Transit leh House to House visit kaltlangtein pek an ni. Vawiin thutkhawm ah hian hri danna dawng tur te zing a eizawnna avanga zin veivak an awm ve reng thin avangin hri danna dawng tur ten an dawn loh phah thin thu tarlan a ni bawk.