Mizoram Sawrkar Information & Public Relations Department buatsaiha  Andaman and Nicobar Islands ah Departmental Press Tour a zin mi 12  ( Department official 3 te leh Mizoram Journalists Association (MJA) member mi 9 te) chu nimin khan Aizawl an lo let a. Press Tour neih chhung hian Andaman a Sawrkar mi pawimawhte an hmuh bakah hmun pawimawh te an tlawh bawk a ni.

Departmental Press Tour a kalte hi December ni 9 khan Aizawl chhuahsanin a tuk December ni 10 a Andaman and Nicobar Islands khawpui Port Blair an thleng a. Port Blair an cham chungin Port Blair a hmun pawimawh hrang hrang an tlawh a, chungte chu : Chatham Saw Mill – Asia khawmuala thingzai factory lian ber leh upa ber kum 1983 a din; Cellular Jail – British  in India an awp laia tan in rapthlak leh zalenna sualtu ten tihduhna leh khaihlum hial an nihna hmun; Ross Island – British  in Andaman thliarkar an awp tanna hmun leh Havelock Island  - an tourism circuit a khualzin te hip ber hmun te. Heng bakah hian Zonal Anthropological Museum – Andaman thliarkar a cheng hnam tlem te, tumah tlawh phal loh te chanchin pholanna hmun te leh Indian Navy te Musuem, tupui nungcha hrang hrang te dahna hmun – Samudrika Marine Museum te an tlawh bawk a ni.

Port Blair an cham chhung hian Andaman & Nicobar Administration, Chief Secretary Pu Chetan B. Sanghi leh Information Publicity & Tourism Andaman & Nicobar Administration hotute leh chanchinbu mite nen inkawm hona tha tak an nei a. India a sawrkar enkawl nitin chanchinbu chhuak awmchhun kum 1920 atanga chhuak – The Daily Telegrams Chief Editor Pi Kanak Radha Chatterjee leh a thawhpuite nen inkawma hun an nei bawk a. Lieutenant Governor Admiral D. K. Joshi in rokhawlhna a neih thut avangin Press Tour a kal ten nen inkawmna hun an nei thei ta lo a ni.

Chanchinbu mite hian Port Blair fai leh thianghlim zia te, thliarkar zimte ni chunga kawng zau tak an neih te, kawng sir an cheibawl dante, an tualchhung thil siam – handicrafts counter an enkawl dante leh hengte hi khualzin ten an bawr dante, a mawina khawih danglam lova natural spot an humhalh dante chu zirtham nia an ngaih thu an sawi a ni.

Departmental Press Tour a kalte hi Andaman Administration a, Information, Publicity & Tourism a Editor Pu Biju Nair leh a thawhpuiten Airport ah lo hmuakin an cham chhung zawng hian an hruai kual a. Press Tour hi Director I & PR Pi Lallianpuii, Joint Director Pu C. Lalnunkima leh MJA Vice President Pu Lalremsiama ten an ho a ni.