Vawiin hian Serchhip District Election Officer, Pu Chuauhnuna chuan Special Summary Revision of Electoral Roll, 2020 Draft Roll chu Serchhip Bawrhsap pisaah a tlangzarh.

Pu Chuauhnuna chuan, Electoral Roll thar buatsaih chhoh dan tur Election Commission in ruahmanna a siam tarlangin, November ni 30 thleng khan Electors Verification Programme (EVP) kalpui a nih hnuah vawiinah Draft Roll tlangzarh a ni a. Inthun thar dil duh te tan vawiin atanga 15.01.2020 thleng hun hawn niin dilna te chu 27.1.2020 ah chin fel tur a ni ang, ni 4.2.2020 hmain engkim peih fela ni 7.2.2020 ah Roll thar chu tlangzarh tur a ni, a ti a. Roll felfai leh tha tak kan neih theih nana thawhpuiah Political Party hrang hrang aiawhte leh khawtlang hruaitute chu a sawm a, Draft Roll copy hi Party hrang hrang aiawh lokal te hnenah a hlan nghal a ni.

Pu Vanlalhmachhuana, Election Officer chuan Draft Roll anga Serchhip District chhunga Constituency pathum te dinhmun tlangpui report a pe a, 26 - Serchhip AC ah voters 18273 an awm a, 27 Tuikumah 15778 leh 28 Hrangturzo ah voters 15743, District chhunga General Electors zawng zawng hi mipa 24342 leh hmeichhia 25452, an vaiin 49794 an awm a, an zingah PWD Voters 304 an tel. Service Voters hi district pumah 392 an awm bawk a ni. Polling Station thar pali, Thenzawl khaw chhungah siam belh a ni a, heng a thar te nen hian District chhungah Polling Stations 81 a awm a ni. 27/28 Vanchengte P/S ah voters an tlem bera mi 84 an awm a, 26/25 New Serchhip III ah voters tam berin mi 1190 an awm a ni.

Vawiina Draft Roll tlangzarhnaah hian Political Party hrang hrang aiawh te, tlawmngaipawl te, chanchinbumi te, ERO leh AERO te an tel a, Roll buatsaih chungchanga zawhna an neih te, rawtna an neih te sawi hona hun hman nghal a ni.