Vawiin hian Serchhip Bawrhsap pisaah ah Bawrhsap Pu Chuauhnuna hovin kan hmaa Christmas leh kumthar lo thleng tur vuakveta mipui ten hlim leh ralmuang tak hunpui an hman theih nana dan leh thupek kenkawh dan tur ngaihtuahna neih a ni.

He hunah hian Police Department lamin venhimna kalpui dan tura ruahmanna an siam te Pu PC Laltanpuia, Addl SP chuan sawifiahna a nei a, Pu R. Sanghmingthanga, President, Sub Headquarters YMA pawhin heng hunpui lo thleng tura branch tinte inbuatsaihna leh sub-headquarters in ruahmanna a siam te tarlanna a nei bawk a, chumi hnuah khawpui chhunga village council aiawh lokal ten tul leh mamawh awm ni a an hriat te an sawi ve leh hnuah hmalak dan tur hi sawiho a ni.

Hunpui chhung hian Police Department chuan bial insemin venhimna an kalpui dawn a, chhun leh zanah patrolling an nei reng dawn a, dan bawhchhia te chu inthlahrung hauh lova an hnena report zel turin mipuite an ngen a ni. Traffic lam pawhin ruahmanna siamin uluk leh khauh taka dan kenkawh an tum a, lirthei riring lutuk te, phal chin baka tlan te leh dan bawhchhe dang te chu an hnena report zel turin mipuite an ngen a ni. YMA Branch tinte pawh anmahni huam chhungah an duty leh dawn a, a tul ang zelin Police te nen an thawk ho dawn a ni.

Heng te bakah hian thil pawimawh dang engemawzat an sawi ho bawk.