Vawiin khan I&PR Department chuan an building hlui kum 40 a upa thiah tur pualin hun an hmang. Building hlui hmunah hian North Eastern Council (NEC) atanga sum hmuh hmangin “Lianchhiari Run - Multi-Facility Centre” sak a nih dawn avangin sorkar phalna in thiah tur a ni.

I&PR Director Pi Lalnithangi chuan kum tam tak lo luah tawh I&PR building thiah tur ani ta chu a thawktute tan uihawmna chen awm thei mahse thil tha zawk leh hmasawnna lian zawk, mipui tana zau zawk leh hlawk zawka rawngbawlna tur a lo inhawn theihna tur a nih avangin lawmawm a tih thu a sawi a. Lianchhiari Run Multi-Facility centre sak tur chu sum hmuh a nih tawh mai bakah sak hna tan tura thil tul hrang hrang tihfel a nih tawh thu te, NEC sum state in a dolet ve na tur State Matching Share pawh peihfel a nih tawh thu a sawi a ni.

I&PR Director hlui Pu Denghnuna, IAS (Rtd.) chu he hunah hian khual tha niin, department din chhoh a nih dan leh tuna Department ram ni ta hi sorkarin a pek a, building sak a nih dan te a sawi a. I&PR Department chu kum 57 a tlin tawh thu te, a tir lama mimal in an luah kual hnu a kum 1975 ah tuna Department hmun hi sorkarin pe hnu a building sak tan nghal a nih thu te a sawi a. Khatih hun laia Agriculture Department chuan I&PR ram thenkhat chu kudam atan a luah hawh a. Chumi hnu ah venhimna chungchangah thu inpek leh inhrilh zung zung theih nan khatih hun laia Secretariat, Police leh Information Department-te chu an karah department building dang mah tla zep lova inhnaih taka an awm a tul avangin kum 1976 khan Agriculture Go-down chu Agriculture Department ramah sawn tak a ni, a ti. Pu Denghnuna chuan Mizoramin hun khirh tak a tawn laia remna leh muanna a awm theihna tura mipui rilru sutthlek siam kawngah chanchinbu mite leh I&PR department thawhhona chuan langsar silo in thui takin hna a thawh thu a sawi a ni.

Mizoram Journalists’ Association (MJA) Preseident Pu Vanlalrema Vantawl pawhin thu sawiin, department leh mipui tana tangkai tak tur building thar sak a la ni tur chu lawmawm a tih leh, MJA leh I&PR Department in thawhhona tha tak an lo neih thin chu chhawmnun zel a nih a, thawhhona tha tak neih chhoh zel a beisei thu te a sawi a ni.

Lianchhiari Run Multi-Facillty Centre sak tur hi chhawng sarih tur niin, hmun thum atanga motor luh leh chhuah theih a ni dawn a. Building hnuai lam hi Tennis Court-Temple Square kawngpui an in, a hnuai lam chhawng li chu motor dahna atan ruahman a ni a. A chung lam chhawng thumah hian Conference Hall, Mini Film Theatre, Art Gallery, Editing Room/Archive Hall te awm tur a nih bakah a inchung zawl (rooftop) chu Exhibition hrang hrang neih theihna tura duan a ni dawn bawk. Elevator leh disabled ramp dah tel a ni bawk ang.

Building hlui thlahna inkhawm hi Pu David L. Thangliana, Joint Director, I&PR chuan kaihruaiin, department thawktute bakah MJA member-te he hunah hian an tel a ni.

Attachment

• Loading attachment...