No.6665/2020-2021

Aizawl, 25th November, 2020 : Vawiin khan Information & Public Relations Director Pi Lallianpuii, MIS, chuan kum 2020-2022 chhunga Mizoram Journalists Association General Headquarters hruaitu tharte lawmpuina hun hmanpuiin I&PR Auditorium-ah MJA Office Bearers, Executive Members leh I&PR Department officer-ten thingpui an inho.

Vawiin MJA hruaitu thar lawmna I&PR Jt. Director(I) Pu C.Lalnunkima, MIS, kaihhruaiah I&PR Director Pi Lallianpui chuan MJA General Headquarters O.B. leh Executive Member zawng zawngte chu lawmpuina leh duhsakna a hlan a, sorkar leh a bik takin I&PR Department hmalakna hrang hrangah MJA-ten theihtawpin an lo thlawp thin avangin lawmthu a sawi bawk. Kuminah Covid-19 hripuiin khawvel pum a tibuai a, Mizoramah ngei pawh sorkarin hmachhawp tha tak tak nei mahse hripui a la len zel avangin hmalak a har hle a, a lungchhiatthlak takzet a ni, a ti. Covid hripui a len laiin ramri buaina a lo awm belhchhah bawk nen, hetiang hunah hian ram chhung leh ram pawna miten an hriat theih turin chanchinthar lakhawmtu media-ten thudik an puanzar chak a tul hle a, hemi kawngah Mizoram media-te chu tun aia nasain tan la turin a fuih.

MJA Gen. Hqrs. President Pu Zonunsanga Khiangte pawhin thusawiin I&PR Department chu Mizoram media-te tan ‘Inpui’ a ni a, MJA nena thawhhona tha tak neih chhunzawm a ngaih pawimawh zel tur thu a sawi. Kumin March thla khan MJA General Conference neih leh hruaitu thar thlan tura ruahmanna siam vek tawh ni mahse, Covid hripui len tak avangin an thulh vek thu sawiin District MJA-te nen inrawnin hun hmasaa MJA hruaitute bawkin kum 2020-2022 chhung pawh an nihna chelh zawm turin lungrual takin an rel thlu ta a ni tih a sawi bawk.