State Agriculture Management & Extension Training Institute (SAMETI), Mizoram leh Extension Education Institute (NE Region), Ministry of Agriculture & Farmers’ Welfare, Govt of India tangkawpin ni 3 awh tur ‘Off-Campus Training on Use of Social Media & Video Producton Skills for Agriculture Extension’ an buatsaih chu vawiin khan Agriculture Committee Room-ah I&PR Director Pu David L.Thangliana’n a hawng. Training hawnna inkhawmah hian SAMETI Director Pu R.K.Nithanga, Course Co-ordinator Pi Lalthasangi bakah EEI, Jorhat atanga Resource Person lo kal Dr.S,Borua leh Pu H.Das te pawh an tel.

I&PR Director Pu David L.Thangliana chuan tunlai khawvelah social media pawimawhna sawiin tupawhin mahni mobile phone humlai hmangin chanchin thar ber, a chhia a tha pawh, a thlen rual rualin khawvel pum hriatah a thawnchhuak thei tawh a; chuvangin mitin te hi social media chak lutuk hman thiam lamah fimkhur a ngai a ni, a ti. Tun ruahsur leh thli avanga Mizoram hmun hrang hranga chhiatna thleng chungchang pawh social media hmangin a inhrilh zung zung theih tawh a, chutianga tangkai taka hmang an awm laiin thenkhatte chuan kumdanga thlalak hluite thehdarhin mipui tichiai zawnga thil an tiduh thin chu a pawi a, hei hi tuman mipui tihderh/tichiai nan ti tawh lo turin a ngen bawk. District hrang hrang atanga Agriculture leh a kaihhnawih department aiawha he training-a telte chuan anmahni district huamchhungah Agriculture Department leh a dangte hmalakna hrang hrang chu I&PR Department-ah thehlut turin a chah a; hei hi district tina DIPRO-te nen thawkho a, I&PR Department-in media kaltanga sorkar hmalakna leh hlawhtlinna a phochhuahna programme-ah te tel a ni thei ang, a ti.

SAMETI Director Pu R.K.Nithanga pawhin thu sawiin Mizoramah State Agriculture Management & Extension Training Institute (SAMETI) din a nih dan leh tuna an dinhmun chungchang a sawi a. SAMETI, Mizoram chu kum 2 din tawh niin tunah hian Director leh Faculty 4 ten an enkawl mek a, hetah hian Agriculture leh a kaihhnawih department - Horticulture, AH&Vety, Fisheries, Sericulture leh Soil & Water Conservation - te tana training hmun pawimawh tak a ni, a ti.

EEI, Jorhat atanga Resource Person lo kal Dr.S.Borua, Asst Professor(SG) chuan SAMETI, Mizoram chu hmarchhak biala SAMETI zinga titha ber an nih thu a sawi a. Agriculture hnathawh dan chu mipuite khawih phak a nih avangin I&PR Department nena inngheng tlat thawk tur an nih thu a sawi bawk.