Vawiin khan Aizawl District Planning Committee thutkhawm hmasa ber chu Aizawl DC Conference Hall ah neih a ni a. Aizawl District Planning Committee Chairman leh Aizawl DC ni bawk Dr. A Mutthamma hova meeting-ah hian Aizawl District huam chhunga MLA pathum - Mizoram Legislative Assembly Deputy Speaker Pu R Lalrinawma, Deputy Chief Whip Pu RL Pianmawia leh Lt.Col.Z.S.Zuala te pawh an tel a ni.

Meeting-ah hian Aizawl District huamchhunga hmalak dan tur a tahtawla ruahhman niin thingtlang khua te a bul tan phawt a ni dawn a, Aizawl Municpal Area huamchhungah chhunzawm leh tur a ni. Economics and Statistics Department kaltlangin an dinhmun chiang zawka zir a nih hnuah thingtlang khaw tin te chu an khaw mamawh intawm, an ngaih pawimawh zual, hma lak hmasakna tur nia an ngaih thil pathum thehlut tura hriattir an ni a. Chung an ngaih pawimawh zual pathum an thehluhte leh bialtu MLA ten an ngaih pawimawh zual an thehluh atangin a indawta hmalak chhoh dan tur meeting-ah hian ngaihtuah a ni.

Khaw tinte mamawh hi felfai takin a kaihhnawih department hrang hrangah then darh a ni leh dawn a, department ten lo zir chiang lehin hmalak dan tur kimchang an buatsaih ang a. Heta an zirchianna hmanga hmalak dan tur ruahmanna (plan) an siam te chu budget-a telh turin sawrkarah thehluh a ni leh dawn a ni.

India Danpui 74th Constitution Amendment Act, Article 243ZD in din tura a tih angin District Planning Committee hi din a ni a. District huamchhunga hmasawnna hna thawh dan tur ruahmanna siamtu leh a enzui hna (monitoring) thawk tu tur Committee ah hian District tinah DC te chu Chairman a ruat niin District Research Officer-te chu Member Secretary an ni.