Vawiin chawhma khan Secretariat Conference Hall-ah ‘Jeevan Raksha Padak Award 2017’ semna hun neih a ni a. Home Department buatsaih niin Home Minister Pu R. Lalzirliana leh Minister of State Pi Vanlalawmpuii Chawngthu ten he hun hi an hmanpui a ni.

Home Minister Pu R.Lalzirliana chuan thu sawiin mite tana nunna pe ngam, thian chhan thih ngam mi huaisen ten chawimawina an dawng dawn a ni, a ti a. Chawimawina dawng tur te chu mite tana malsawmna ni zel turin a chah a ni.

Programme hi Home Principal Secretary Pu Lalnunmawia Chuaungo, IAS chuan a kaihruai a. Awardee aiawhin Pu F. Lalmalsawma (F.Lalchhandama pa) chuan thu a sawi a ni. Jeevan Raksha Padak Award 2017 hi mi panga hnenah hlan niin Medal, Certificate leh tangkafai hlan an ni a. Heng tuitla, kangmei, leimin, ramsa leh a dangte laka chhiatna thleng thin avanga nunna  chhanchhuaktute hnenah pek thin a ni a. He hunah hian Award dawng turte leh an chhungte, Home Department hnathawkte an tel a ni.

Jeevan Raksha Padak Award hi mi huaisente hnenah hlan thin niin Award hrang hrang te chu:

1)    Sarvottam Jeevan Raksha Padak Award: Rs 2 lakh

2)    Uttam Jeevan Raksha Padak Award: Rs.1.5 lakh

3)    Jeevan Raksha Padak: Rs 1 lakh

Kum 2017 Award dawngtute chanchin:

F.LALCHHANDAMA (L) (Kum 17), Tuikual South, Aizawl District:

May Ni 7, 2017 khan Tlawng luiah a kalpui C. Lalremkima leh Lalmuansanga tui tla a chhanchhuahna lamah a nunna a chan ta a ni. Mahni nunna thapa a thilih ropui tak avang hian Sarvottam Jeevan Raksha Padak Award pek a ni a. F.Lalchhandama pa, Pu F.Lalmalsawma chuan a dawn sak a ni.

 B.LALTLANTHANGA (Kum 52) Khatla,Aizawl District:

August Ni 16, 2017 khan B.Laltlanthanga leh a thian palite chu Tuirial kam ramhnuaiah kalin mau an sat a, luia mau pum lian phuarkhawm lak tum a thiante-Lalnuntluanga, Lalrinawma leh Sangliana te chesual, tuia tlahlum tur nunna a chhanchhuak a. Mahni nunna thapa a thiltih ropui tak avang hian Uttam Jeevan Raksha Padak hlan a ni.

ZONUNTLUANGA (Kum 16), Sialhau, Serchhip District:  

August Ni 20, 2016 khan Zonuntluanga leh a pa, Pu K.Lalthanpuia nen Char ngawram, Sialhau-ah chawhmeh zawng turin an ram chhuak a. An haw kawngah savawmin Pu K. Lalthanpuia chu a lo bei thut a, hliam na tak tuara a awm laiin a fapa hian chempui nen chauh savawm chu huaisen takin a bei let a. Uttam Jeevan Raksha Padak pek a ni.

LIANHMINGTHANGA (Kum-21), Rengtekawn, Kolasib District

May Ni 7,2016 khan Lianhmingthanga hi a thiante pahtum nen Chem luiah kalin lui an daikainaah  tui chak takah a thiante chu chesualin an tla ta a. Lianhmingthanga hian a thiante pathum-Lalduhawmi, Lalpiangmawii leh Pi Nianglami te thi mai tur chu a chhanchhuak a, a huaisenna avang hian Uttam Jeevan Raksha Padak hlan a ni. Lianhmingthanga nu, Pi Ngamliani chuan a dawn sak a ni.

ZAIREMTLUANGA (Kum-16), Champhai Kahrawt, Champhai District

August Ni 2, 2016 khan inchhawng 4-na tukverh, feet 22 vela sang atanga naupang Jordan Malsawmdawngfela tla , leia insawha step awih taka lum mai tur chu Zairemtluanga chuan ama tana hlauhawm tur pawh pawisa lovin a lo dawng a, nunna hlu tak a chhanchhuak a ni. Jeevan Raksha Padak Award hlan a ni.