475/2026-2027 

Lunglei, 2026 Ṭomir thla ni 12: Mizoram sawrkara Information & Public Relations (I&PR) Director Pi K. Vanlalsangi chuan vawiin khan District Information & Public Relations Office, Lunglei tlawhin, District office dinhmun a enfiah bakah, an mamawh hrang hrang a enpui.

I&PR Director hi District Information & Public Relations Officer Pu C. Lalhruaitluanga hovin I&PR-a thawktute'n an lo dawngsawng a. Office hmunhma en hovin, office tihchangtlunna tur leh thil pawimawh hrang hrang an sawi ho. 

I&PR Director Pi K. Vanlalsangi chuan I&PR Office Lungleia thawktute'n department leh ram tana theih tawp an chhuah ṭhinnaah lawm thu sawiin, ṭhahnem ngai taka thawk zel turin a chah a. Thawktute zingah thawh hona ṭha chhawm nung zel tur leh office hmunhma leh bungruate chu uluk tak leh ṭha taka enkawl chhunzawm zel turin a chah bawk.

I&PR Director hian Lunglei Office-a Conference Hall chei ṭhat mek chhunzawmna tur sum a hlan nghal a. DIPRO Pu C. Lalhruaitluanga leh thawktute chuan Director leh department hotute'n an ngaihsakna leh duhsak ṭhinnaah lawm thu an sawi.