476/2026-2027

Aizawl, ni 12 May, 2026: Vawiin khan Pu TBC Lalvenchhunga, MLA leh Adviser to Chief Minister (Finance & Planning) chuan Helen Lowry Higher Secondary School 28th Graduation Commencement Program, "Reaching New Heights" tih thupui hmanga an school auditorium, Seventh Day Tlanga buatsaih chu khuallian niin a hmanpui.

Zirlaite hmaah thu sawiin Pu TBC Lalvenchhunga chuan, hun hi a liam chak hle mai a, a uiawm a ni. Chuvangin kan kalna lama hlawhtlinna kan chan thuai theih nan tumruhna leh taihmakna a pawimawh hlein ka hria a. Ka hun lo hman tawh dante ka ngaihtuahlet pawhin a dikin ka hria a ni.

Tuna in hun tawn mek hi eng stream nge thlan tur, eng hna nge thawh tur tih leh eng kawng nge zawh tur tih ngaihtuaha rilru a hah hun lai a ni a. Thian thate leh chhungte nawrna avanga mahni tui zawng ni miah lo thlan palhte pawh a hlauhawm. A hlawkna lam ringawt ngaihtuah a, mahni tuina ni miah lo kawng thlan palh chuan inchhirna a thlen thei a, hun kan khawhral thei bawk a. Chuvangin, eng hna nge thawk ila ka tan tha ang tih ngaihtuahna tak tak sen thiam a tha a. Chhungkuaa sawiho fo tur a ni, a ti.

Zirlaite chu harsatna hmachhawn ngam tur leh inelna sang tak hmachhawn ngam tura fuihin, inbuatsaihna tha neih a pawimawh reng a, chhel a ngai bawk thin. Beidawng mai thinte hi an hlawhtling mawh hle a, vawi tam tak hlawhchham hnu pawha beinawn zel peihte hi an lo ding chang nge nge thin a ni, tiin beidawng mai mai lo turin a fuih a. Zirlai pass thar zawng zawngte lawmpuina a hlan a ni.

He hunah hian Headmaster, Pu Rotluanga Tochhawng hnen atangin School Report ngaihthlak a ni a. HSSLC-ah pass percentage 87.50% an nei a, zirlai 224 exam-ah 196 an pass a ni.

Report-a a lan danin stream hrang hranga an result chu hetiang hi a ni:

Commerce Stream: 100% pass. 

Arts Stream: 85.53% pass. 

Science Stream: 82.76% pass.

HSLC lamah pass percentage 94% an nei a, zirlai 84 exam-ah 79 an pass a. Distinction-ah 10, First Division-ah 30, Second Division-ah 26, leh Third Division-ah 13 an pass a ni.

Helen Lowry School hi January 17, 1950 khan Pastor leh Mrs. Lowry ten District Superintendent bungalow-ah zirlai 10 lek neiin an din a. Mizorama English Medium School hmasa ber a ni a, kum 2000 khan Higher Secondary School-ah hlan kai a ni. 

Graduation ceremony hi Pastor Rodingliana, President of the Mizo Conference of SDA chuan khualzahawm niin a telpui a ni.