No.7652/2020-2021

Vawiin hian Pi Lallianpuii, MIS, Director, Information & Public Relations Department chuan Serchhip District a tlawh a, Serchhip DIPRO Office enin, MJA Serchhip te leh Serchhip Photographer Association hruaitute nena inkawmna a neih bakah Serchhip Press Club thar a en bawk.

Serchhip MJA te nena DIPRO Office a an inkawm honaah Pi Lallianpuii chuan, District hrang hranga I&PR hmunhma te, sawrkar thu puanzar kawnga department thawhpui pawimawh Mizoram Journalist Association te dinhmun tlangpui hmuhpuite, district hrang hranga sawrkar hmalakna thar duhawm tak tak pung chho zel te tlawha zinkual tul a tih thu a sawi a. Ram inrelbawlnaa thil pawimawh sawrkar leh mipuite inkara inhriat tawnna tha leh inrintawnna a awm zel theih nana palai hnathawktu anni tih hriaa taihmak chhuah zel tura duhsakna hlanin, Serchhip DIPRO nen inpawh taka hna thawk ho zel turin a chah a ni. He hunah hian Serchhip MJA President Pu Kapliana Pachuau pawhin thusawiin I&PR Director in Serchhip DIPRO Office te, Press Club thar te a tlawh bakah MJA te nena inkawm hona hun tha tak a buatsaih sak chu lawmawm a tih thu a sawi a, Press Club an neih theih nana I&PR department thahnemngaihna zawng zawngah lawmthu a sawi bawk a ni.

MJA te nena hun a hman zawh hian Serchhip Photographers' Association hotute nen inkawm hona hun a nei leh a. SPA hruaitute hian nikum lama I&PR Director in duhsak taka Exposure Tour a buatsaih saknaah lawmthu an hrilh a.  Visual lama hmasawn a tulna leh hmalak zel dan tur te sawi hovin, an mamawh te Director hi an lo dil bawk a ni.

He mi hnu hian Serchhip Press Club thar, CM Special Fund sum hmanga sak chu a tlawh leh a ni.