No.7651/2020-2021

January ni 18 - February ni 17, 2021 chhunga hman, lirthei chetsualna laka him nana fimkhur tura inzirtir uar thla (Road Safety Month) puala Lawngtlai District chhunga traffic police thawk tha, driver tha leh lirthei fai thlan chhuahte chu vawiin khan Lawngtlai DC office chamber-ah lawmman hlan an ni.

He hun hi Lawngtlai District Transport Officer Pu V. Lalruatliana'n kaihruaiin, Lawngtlai Bawrhsap Dr Andrew H. Vanlaldika'n lawmmante hi a dawngtute kutah a hlan a ni.

Lawngtlai Bawrhsap chuan Road Safety Month hman chhunga Lawngtlai District-a nunna leh bungraw channa, lirthei chetsualna lian tham a thlen awm hriat a ni lo chu lawmawm a tih thu a sawi a. Mihring nunna thui taka innghahna a nih avangin lirthei khalh danah fimkhur reng a tul thu sawiin, lirthei khalh chungchanga himna tur dante chu Road Safety Month hman chhung chauh emaw, traffic police duty awm lai chauh emawa hmang lo va, eng tik lai pawha vawn reng leh zawm reng a pawimawh a ni, a ti. Hmun dang atanga khualzin lo kalte hmuha District hmel timawitu ni thei turin khualzin phur leh sumdawng lirthei khalhtute chu hawihhawm leh rinawm, fai taka lirthei enkawl thin mi nih tum turin a fuih a. Khawpui chhunga lirthei che vel a felfai zel nan leh mipui tana him a nih theih nan thahnem ngai taka thawh chhunzawm zel turin traffic police te chu a chah bawk.

Road Safety Month 2021 pual hian Lawngtlai District-ah heti ang hian lawmman sem a ni:

1. Traffic police tha ber: Pu C. Lalsiamthara, Constable

2. Driver tha ber: Pu LZ Dingliana, Maxi Cab (MZ 07 3856) driver

3. Motor fai (commercial vehicle):

1) Pu Vanlalhruaia, Taxi (MZ 02B 0731) 

2) Pu Samuel Roluahpuia, Auto Rickshaw (MZ 07 2692)