No.7650/2020-2021

Vawiin khan Health & Family Welfare Minister Dr. R. Lalthangliana, Higher & Technical Education changtu ni bawk hovin Assembly Annexe Committee Room ah college hawn chungchangah meeting pawimawh tak neih an ni, March ni 1, 2021 atangin college leh zirna in sang zawk te chu hawn nise tiin an rel a ni.

Health Minister Dr. R. Lalthangliana chuan College leh zirna in sang zawk te hawng leh tura ruahman hi a taka kalpui a nih dawn avangin hemi changchanga inkaihhruiana dan SOP te uluk leh fimkhur taka inthlahdah miah lova zawm a pawimawhin a tul hle dawn a ni, a ti a. Hemi kawngah hian college leh zirna inah thuneitu leh zirtirtu te chu SOP in zawm a hlawh ngei nan an mahni zawnah theuh theihtawp chhuaha tan la turin a chah a. Chutih rualin, School Education Department hnuaia sikul zawng zawng pawl thenkhata zirna kalpui mek te chu hemi kawnga Sawrkarin dan leh dun a siam te, inkaihhruaina hrang hrang a tichhuah, hman mek leh kalpui mek te, tih leh tih loh tur a sawi leh puanzar te chu ngaipawimawh theuh turin a chah tel a. Mipui te pawh hripui dinhmun in that lam a pan mai tia in thlahdah lovin inkaihhruaina dan hrang hrang te chu entik lai pawhin ngaipawimawh turin a chah bawk a ni.

Meeting ah hian March ni 1, 2021 atangin college te hawn nise tia ruahmanna lo awm tawh chu a taka kalpui dan uluk takin an thlirho a, hemi chungchanga SOP duan tawh te pawh an enho a, siamthat ngai lai tlem awm te chu an sawiho hnuin, tha tiin an pawm tlang a. Meeting chuan Mizoram pumah college leh zirna in sang zawk hrang hrang – University te, NIT, College of Veterinary Sciences leh adangte chu March ni 1, 2021 Thawhtan ni atangin hawn leh nise tiin an rel a. Meeting chuan heng zirna inah canteen leh hmun danga punkhawmna ang chi te chu uluk leh fimkhur taka enzui turin zirna inah thuneitute chu an chah bawk a. Heng zirna inah te hian uluk takin college thuneituten thermal screening an kalpui a tul dawn a, ruahmana hi Health Department te nen inberawn a an siam a ngai dawn a ni.

Meeting ah hian Dr. ZR Thiamsanga, MLA, Vice Chairman, Health & Family Welfare Board; Dr. Vanlaltanpuia, MLA, Vice Chairman Higher & Technical Education Board te bakah Health & Family Welfare Department, Higher & Technical Education Department leh Disaster Management & Rehabilitation Department hotulu leh aiawhte an tel a ni.