Vawiin khan Information & Public Relations Director, Pu Jim K. Chozah leh ram pum huap pawl, Akhil Bharatiya Bhrashtachar Nirmulak Sangharsh Samiti (All India Anti-Corruption Action Committee) hruaituten a pisaah inkawmna hun an hmang.

Akhil Bharatiya Bhrashtachar Nirmulak Sangharsh Samiti hian “Uttarpurva Darshan” (Northeast Vision) programme kalpuiin, India hmarchhak State hrang hrang an tlawh kuala. Mizoramah pawh “Tunlai Mizoram Hnam Nunphung” zirchianna rawn neiin; Mizo hnam nunphung leh ziarang, hnam incheina, hnam lam leh zai te khawvel hriata pholang turin, documentary siam an tum thu an sawi a; episode engemawzat siamin, nakkum February thla chhunga tan hman an tum thu an sawi bawk.

Pu Jim K. Chozah, I&PR Director chuan an Department-in Mizorama lemchan tihhmasawnna kawnga an hmalaknate lo hrilhin, Mizoram Film Development Society nen thawhhona tha tak an neih thu a sawia; Akhil Bharatiya Bhrashtachar Nirmulak Sangharsh Samiti hruaitute chu Mizoram chungchanga documentary siam an tum chu khawvel zau zawk amiten Mizoram an hmelhriatna tur a nih a beisei thu sawiin, tourism-ah pawh hlawkna a thlen tur thu leh, documentary siam turah pawh theihtawp chhuaha an tawiawm tur thu a hrilh bawk.

He inkawmhonaah hian Akhil Bharatiya Bhrashtachar Nirmulak Sangharsh Samiti hruaitu-Pradeep Patil Khandapurkar, National President, Mumbai; Manoj Pathak, National Vice President, Punjab; Sharad Singh Thakur, Bollywood Film Producer, Mumbai; Shivaji Deka, Coordinator of Assam, Guwahati leh Dipen Kunwar, Member, Guwahati te telin; Dr. V.R.Ralte, President & Director, Universal Hindi Communications Centre, Aizawl chuan a tawiawm bawk a ni.