Vawiin khan Aizawl Art Gallery, Khatla ah Pu Jim K Chozah, Director, I&PR chuan ni 4 awh tur MADS Annual Art Exhibition-2016 a hawng.

Art Exhibition hawngtu Pu Jim K Chozah chuan I&PR Department leh MADS thawhhona chu inlungrualna leh inhriatthiamna tha tak karah a kal zel a ni tiin MADS chuan hmalakna tha tak hnuaiah Mizo lemziak leh lemtuk lama tui mi te tan an talent phochhuah na remchang a siamsak chu lawmawm a tih thu a sawi bawk. Lemziak atanga duhthusam hlawkna an hmuh loh pawh in hmun dang atanga Mizoram rawn tlawh tute leh Mizo Mipui zingah ngei pawh lemziak mi te chu Mizo nunphung pholangtu an nih thu sawiin beidawng mai loa an thlen chin atanga hmasawn zel tur in a chah. Mizo lemziak mi te kutchhuak chu khawi hmunah pawh a zahpuiawm loh thu sawiin lemziak mi te chu Mizo thalaite tan lemziak hmanga finna leh hriatna hnutchhiah turin a fuih a ni.

Annual Art Exhibition-2016 hawnna hi Pi Lallianpuii, Dy. Director I&PR leh Nodal Officer in a kaihruai a. Pu Vanlalhriata, Gen Secy, MADS hnen atangin report ngaihthlakna neih a ni. Report in a tarlan dan in Exhibition chi hrang hrang, solo,duet exhibition,pottery leh lem ker te vawi tamtak buatsaih a ni tawh a.MADS member 74 zing atangin member 35 te kutchhuak chu Aizawl Art Gallery, Khatla, S&S Gallery, Lower Zarkawt leh Art Novelty, Chaltlang ah te vawiin atang hian pho chhuah an ni a. A duh apiang tan tlawh theih a niin lemziak te hi leitheih a ni bawk a ni.

He Art Exhibition hi November 19 thleng neih a ni ang a, a kharna hun Archives Hall, Babu Tlang a neih tur ah hian On The Spot Painting Competition for Middle and High School Students tan buaitsaih a ni dawn a,lawmman semna hun buatsaih a ni bawk ang. Hei hi Finance Minister Pu Lalsawtan a hmanpui dawn a ni.