Aizawl khawpui chhung tawt lutuk tizaawm tura Urban Development & Poverty Alleviation Department hmalakna pakhat atan nimin (14.11.2016) tlai dar 4:00 PM khan UD&PA Minister Pu Zodintluanga office chamber-ah Aizawl khawpui chhunga ropeway siam theih dan tur ngaihtuah a ni. He hunah hian UD&PA Department leh Public Works Department hotute an tel bakah Aizawl Municipal Commission aiawhte an tel a. Khawvel huap a ropeway siam lama hma tam tak lo laa hmahruaitu company Doppelmayr Garaventa Group, India Pvt. Ltd Chief Executive Officer Pu Vikram Singhal chuan an company hnathawh dan chungchang leh khwvel ram hrang hranga rope-way siam hna an thawh tawhte leh, Mizoram tana a tangkai theih dan tur presentation a pe a ni.

UD&PA Minister Pu Zodintluanga chuan khawpui chhung traffic leh mipui kalna tur tiziaawm tura hun engemaw chen a lo ngaihtuah tawh thu leh, Asian Development Bank pawhin report a lo siam sak atanga Ropeway Project buaipui anih mek lai a Doppelmayr an lo lang chu Mizoram tan malsawmna nasa tak nia a hriat thu a sawi a. A siamna tur sum lamah ADB kaltlangin ani emaw, Doppelmayr kaltlangina ni emaw, engti zawng pawhin kalpui ila, Mizoram tan chuan thil tha tak a nih tur thu Minister hian sawiin, Ropeway an siam dan tur leh a hnua an enkawl dan tur ‘terms and conditions’ ram danga an tih dan te en telin, mipui tana awlsamna ni bawk si ngaihtuah chungin Sorkar pawhin theihtawp a chhuah ngei tur thu a sawi bawk.

Dr. Vanlalramsanga, Secretary, UD&PA leh Planning pawhin, Rropeway siam theihna tur remchang tak Mizoramin a nei thei tur chu lawmawm a tih thu sawiin, Doppelmayr Garaventa Group kal tlanga ropeway neih theih anih chuan a enkawl zui kawngah pawh Sorkarin a buaipui a ngai dawn lo a, keini ang State tê, resource nei tam lo tan chuan chu chu a vanneihthlak hle dawn a ni, a ti bawk.

Ministry of Urban Development, Govt. of India bultumin Asian Development Bank chuan Mizoram Sorkar hnenah Technical Assistance 8765 IND : Supporting Sustainable Urban Transport in Aizawl City chu Report a lo siamsak tawh a. He Technical Assistance Report hmang hian UD&PA chuan Asian Development Bank sumin, Ministry of Urban Development, Govt. of India remtih nain Mizoram Sorkar External Aided Project zinga telh turin a buatsaih mek a ni. He Survey Report hi Asian Development Bank consultant siam niin, ruahman chhinnaah chuan (1) the full east-west ropeway (Thuampui to Solomon’s Temple, 5.5km); (2) the short east-west ropeway (Thuampui to CMO’s office, 2.4km); (3) north-south alignment (Durtlang to Zemabawk, 7.5km) te an ni a.

Nimin presentation pek hnu ah hian Doppelmayr Garaventa Group, India Pvt. Ltd aiawhte nen hian mipui tana tangkai leh huap zau zawka ropeway siam anih theih dan tur te sawiho niin, siam lo ni dawn ta se a line/ kalkawng tur leh ban dah theihna tur te thlithlaiin tukin zing khan Aizawl khawpui chhung hmun hrang hrang en nghal a ni.

Doppelmayr Garaventa Group hian khawvel ram hrang hrang 90 chuangah ropeway siam hna hi an lo kalpui tawh thin a, ropeway siamna hmun, a hralhna leh service pek theihna pawh ram 35 chuangah an nei mek bawk a ni. Doppelmayr Garaventa Group hi Austria leh Switzerland-ah hmunpui neiin khawvelah chuan ropeway siamtu lian ber an ni. Tun tuma Aizawl khawpui tana ropeway siamna tur rawtna an siamah hian Aizawl khawpuiah traffic tihziaawm nan ropeway siamin, chuta senso zawng zawng chu anmahniin an tum vek ang a, an siam zawhah Mizoram Sorkarin ngaihhnathiamna hun kum 22 chhung vel concessional period a pe ang a, Mizoram Sorkar sum tel lovin construction leh operation an ti thei dawn a ni.