Vawiin khan Transport Minister Pu John Rotluangliana chuan Vanapa Hall bula Transport building thar sak mek chhawng hnuai berah pangpar chi hrang hrang pho chhuah leh zawrhna Mizoram Florists' Association buatsaih Florists Fair a hawng.
Pu John Rotluangliana chuan Mizoram Florists' Association te hmalakna avangin Mizoramah pangpar chi hrang hrang lak luh niin pangpara sumdawnna pawhin hma a sawn a ni, a ti. Ram chhung khawpui hrang hrang a fannaah Mizoram pangpar khawi thiamte tluka khawi mawi a hmuh loh thu sawiin Aizawl khawpui bakah Mizoram hmun hrang hrangah pangpar chin dan leh khawi dan te zirtir zel turin Florists' Association hruaitute a chah a. Pangpara sumdawn chu eizawnna tha tak a tling tiin State pawn lama thawnchhuah theih hial khawpa tam an thar chhuah theih nan tang sauh sauh turin Minister chuan a fuih a ni.
Florists' Fair hian November ni 18 thleng a awh dawn a. Pangpar khawitu mi 61 ten an thar chhuah pangpar chi hrang hrang leh plants te, lei tha leh pot thlengin lei theih turin an phochhuak a ni.
Mizoramah pangpar a tam thei ang ber thar chhuak a, pangpar chin leh khawi lamah hma kan sawn zel theih nan leh pangpar chingtute hamthatna ngaihtuah turin Mizoram Florists' Association hi kum 1997, November 11 ah din a ni a. Tun dinhmunah Mizoram hmun hrang hrangah branch 15 an nei mek a ni. Kum 1999 atang khan flower show leh fair buatsaih tanin kum khatah vawi li te an nei thin.
