469/2022-2023
Aizawl, the 11th May 2022 : Indian Institute of Mass Communication (IIMC) Regional Centre Aizawl sawmna angin vawiin khan Information & Public Relations Department officers, Pi P.B.Lianthangpuii Jt.Director leh Pu Pratap Chhetri Dy.Director te chuan IIMC Regional Campus, MZU Tanhril a journalism zirlai naupangte chu inkawmhona hun Interactive Session an neihpui a. IIMC Lab Journal "IIMC Express" chu Pi P.B.Lianthangpuiin a tlangzarh nghal a ni.

IIMC zirlai te nena Interactive Session ah Pi P.B. Lianthangpuii chuan zirlai naupangte chu fuihin thalaiten rilru zawng zawng an pek phawt chuan eng hna pawh thawk se, hna tha leh hna zahawm a ni thei a, eng hnaah pawh a pawimawh ber chu rinawmna leh tihtak takna a ni, a ti a. Tunlai India ram media te hnathawh dan chu hmanlai nen tehkhinin a danglam nasat tawh dan sawiin, media leh chanchinbu mite chu mipuite thlavang hauhva, democracy vawnghimtu leh khaidingtu pawimawh ‘fourth pillar of democracy’ anga ram rawngbawltu an ni thin a. Tunah chuan mi thiltithei tlemte in media hi politics hmanrua leh sumdawnna atan an hmang nasa ta hle niin a lang a. IIMC zirlai te chu an zir chhuah hnuah sawrkarah emaw, corporate sector leh media lama an thawk a nih pawhin an hnathawhna leh awmna hmun apiangah rilru nghet tak pu a, thil tha zawk tur atan chuan mite duhsak loh leh mal tlat pawh huam zel turin a fuih a. India ram media kalphung thlak danglam tura huaisen taka hna thawk turin a chah a ni.

IIMC Regional Centre a , Regional Director Pu L. R Sailo chuan IIMC Regional Centre din chhoh dan te, kum 10 chhunga zirlai an neih dan te leh course an zawh hnua an zirlai naupang ten journalism leh a kaihhnawih hna hrang hranga hlawhtlinna an hmuh dan te a sawi a. Pi P.B. Lianthangpuii leh Pu Pratap Chhetri te chuan Mizorama media leh chanchinbu te hnathawh leh kalphung chungchanga zirlai ten zawhna an neih te leh I & PR Department hnathawh dan chungchanga zawhna an neihte chu chhangin sawihona hun tha tak an hmang ho a ni.

IIMC Regional Centre hi kum 2011 a din niin he Institute atang hian zirlai 70 velin Diploma Course in English Journalism an lo pass chhuak tawh a ni.