468/2022-2023
Aizawl, the 11th May 2022 : Vawiin khan Rural Development Minister Pu Lalruatkima’n video conference kaltlangin Pradhan Mantri Krishi Sinchayee Yojana Version 2.0 chungchangah district tina officers leh staff te meeting a neih pui.

Minister Pu Lalruatkima chuan thu sawiin Project ruahmanna atan hian sawrkar chuan fund hmahruai thenkhat a dawng tawh tih tarlangin hemi atan inbuatsaih ngai hrang - a hnathawktu lak leh training te pawh kal pui chhoh mek a nih thu sawiin. Thahnemngai leh rotling tura hnuhma neiturin thawktute a chah a. PMKSY Version 2.0 hnuaia hnathawh te hi Central, State, District leh Project Level ah kalphung mumal tak Union Ministry in a rawn siam anga kalpui a, document felfai taka vawn leh heng bakah Computer Software application MIS, GIS leh PFMS te data mumal taka dahluh a nih thu sawiin; kumin a hnathawh tur lo awm zelah pawh fimkhur leh uluk taka document zel turin a chah bawk a. PMKSY WDC 2.0 hnuaia ruahmanna (Plan) leh hmalakna siam te hi mipuite hriatpuina leh tel vena Gram Sabha (vantlang inkhawm hmangin)-a siam leh duan thin a nih avangin hnathawh a langtlang a, chuvangin, Programme tamtak zingah PMKSY WDC hi mipui chhawr berte zing a mi leh ram leilung humhalh kawnga chhenfakawm, sustainable management tha tak a nih thu a sawi a.

Annual Action Plan te thlir ho a nih bakah sawihona hrang hrang neih a ni a. He hunah hian RD Director Pu R. Lalthazuala leh Joint Director Pu K. Lalhmuakliana ten Minister hi an telpui a ni.

PMKSY WDC 2.0 hian Common Guidelines fel tak neiin hemi behchhan hian hna pawh thawh thin a ni. He project in a tum bulpui ber chu “Land Base Development” a ni a, kan ram chhe tawh te , ram tha lai vawn him te, tui hna siam leh humhalh te, leilung kal ral tur leh a dang tam tak a hmalak ani. Heng atan hian Major Activity hrang hrang - Land Development, Soil & Moisture Conservation leh Water Harvesting Structure te hi kalpui a ni. Project tuam chin khua amite zingah mi chhumchhia leh hmeithai, eizawnna mumal neilo eizawnna ruahman sakin SHG leh mimal ang te hmangin bul a tanpui thin a ni.

PMKSY-WDC 2.0 hnuaiah hian Project khat zelah 2000ha atanga 2500ha a zau a hmalak a ni a, hectare khat hi Rs 28000 zela chhut a ni a, Project sum hi Central leh State-in 90:10 in an intum sem a. He project hian distict tin tuamin, block 18 leh village 47 lai a tuam a, micro watershed 90 lai siam tura ruahman a nih bakah. A vaia area (total area for treatment) hi 44600Ha a zau a ni.