Kum 2016-2018 chhung atana MJA General Hqrs. hruaitu thlan thar te leh Information & Public Relations (I&PR) Department hotute chuan vawiin khan I&PR Conference Hall-ah inkawmhona hun an hmang.

He hun hi I&PR Director Pu Jim K.Chozah chuan kaihruaiin MJA hruaitu thar te lawmpuina a hlan a, lungrual taka thawh ho puiah a sawm a ni. MJA Vice President thar Pu Zonunsanga Khiangte pawhin I&PR Department nena thawh hona tha tak an neih thin chu chhawm nun zel tul a tih thu leh MJA lamin rawtna an neih te a sawi bawk.

Sawrkar hmalakna a zau thei ang bera puanzar a nih theih nan Department hrang hrang project thawh mek a hmunhma ngei a tlawh thin an ngaih pawimawh thu te, Journalist-te tana Seminar/Workshop buatsaih tha an tih thu te, sorkar advertisement leh Press tour chungchang bakah I&PR leh Journalist te hmasawnna tur thil pawimawh ni a an ngaihte huam zau takin an sawi hova. I&PR Director chuan tan rualna leh inhriatthiam tawnna boruak tha hnuaiah chuan harsatna lo thleng a awm pawhin chak zawkin a chinfel theih tiin chuan journalist-te hmasawnna turin theihtawp an chhuah chhunzawm zel tur thu a sawi bawk.

He inkawmhona hunah hian MJA Office Bearers leh Executive Committee-te, MJA President hlui Pu Lalbiakthanga Pachuau bakah I&PR Officer- te an tel a ni.