Mizoram Blind Society leh National Institute for Empowerment of Persons With Multiple Disabilities (NIEPMD), Chennai te tangkawpa mitdel puala infiamnaa inelna hmasa ber Mizoram Blind Sports, ni 3 awh tur chu vawiin chawhma dar 10:00 khan Health Minister Pu Lal Thanzara’n Government Complex Field, Luangmual ah a hawng.
Khuallian Pu Lal Thanzara chuan mitdelte chawikanna tur thinlung pu-a Mizoram Blind Society changtlung tak din a ni chu lawmawm tiin mitdelte puala infiamna programme an huaihawt thei chu ropui a tih thu a tarlang bawk. Khawvel ram changkang apiangin rualbanlo te an ngaihsakin an chanvo humhalh nan hma an la nasa tiin Minister chuan Mizoram Sawrkar pawhin chumi kawngah theihtawp a chhuah mek thu a sawi lang a, rualbanlo anga awm reng chuan hma a sawn theih loh tiin hmasawn duhna thinlung pu-a hma an lakna te chu ropui a tih thu a tarlang bawk. Mitdel hla phuah thiam Fanny J.Crosby pawh khawvel hriat khawpa ropui a nih thu sawiin a nun atanga zir tur tam tak kan neih thu te a sawi bawk. Mitdel Lalbuatsaiha, Ph.D. zir mek chu ropui a tih thu sawiin duhsakna a hlan a, Mizoram Blind Society hnenah Rs 50,000/- a hlan bawk a ni.
Khualzahawm Pu K.Lalnghinglova, Principal Secretary, Higher & Technical Education pawhin thu sawiin duhsakna a hlan a, he Sports hmanpuitu Pu Dhanavendan, Special Teacher & Coordinator, NIEPMD, Chennai atanga lo kal pawhin mitdelte puala sports programme huaihawt a ni thei chu ropui a tih thu a sawi lang bawk. Mizoram Blind Sports hi Pu C.Dinthanga Convener, Mizoram Blind Society-in a kaihruai a, Mizoram Blind Society President Pu Elvin Zothantluanga pawhin thusawina hun a hmang bawk.
Mizoram Blind Society hi 2005 ah din niin, mitdel te pualin programme/activity hrang hrang te an hmang thin a, an zingah hian MA, M.Phil., Graduate engemawzah an awm nghe nghe a ni. Mizoram Blind Sports ah hian Games & Sports Association, Govt. Complex kaihhruaina hnuaiah infiamna chi hrang hrang - football, cricket, inhruipawh, kut inelh, lungden, discuss throw leh long jump ah te an intihsiak dawn a ni.
