2360/2024-2025

Champhai, 3rd October 2024: Vawiin chawhma khan I&PR Auditorium, Champhai-ah Information & Public Relations Department leh Hnahsin Kut Organising Committee te ṭang kawp buatsaihin Hnahsin Kut 2024 Painting Competition neih  a ni a. Intihsiaknaah hian  Champhai District chhunga High School, Higher Secondary School leh College zirlai te an tel a ni.

Painting Competition hi Category hnih (High School leh Higher Secondary + College) ah ṭhen niin, a tiṭha zual te tan lawmman ṭha tak ruahman a ni. Hei bakah hian I&PR Department leh Hnahsin Kut Organising Committee (Champhai Photographers Society) te ṭang kawp hian Kut pual hian Photo Exhibition, Aui Garden-ah an buatsaih bawk a. Painting ṭha zual te pawh pho chhuah tum a ni.

Champhai DIPRO Pu Lalchhuawma Ralte chuan Hnahsin Kut 2024 puala Painting Competition leh Photo Exhibition buatsaih anih theih nan a tha thawhtu - I&PR Directorate hotute, Hnahsin Kut Organising Committee, Champhai DEO leh sikul hotute zawng zawng chungah lawmthu a sawi a. Painting Competition leh Photo Exhibition te chu Arts Development hmahruaitu mai bakah leilung leh nungcha humhalhna kawnga harhtharna thlentu ni se a duh thu a sawi bawk a ni.