1760/2026-2027

Dated Aizawl, the 13th August 2026: Vawiin khan North Eastern Council (NEC) bultumin Entertainment Society of Mizoram (ESM) leh Directorate of Information and Public Relations tangkawp chuan I&PR Mini-theatre, Lianchhiari Run, Aizawl-ah Film-Fest 2026 (Short & Documentary Film Festival) an buatsaih. Information, Public Relations, Printing & Stationery Secretary Pi Betsy Zothanpari Sailo chuan Film-Fest 2026 a hawng a ni.

Khuallian chuan Film Industry chu intihhlimna ngawt ni lovin, eizawnna kawng hrang hrang siamsak theitu, hnam ziarang pho chhuahna leh hnam humhalhna hmanraw pawimawh a ni, a ti. Short film leh Documentary Film chuan Film industry huang chhungah hmun pawimawh tak an luah tih sawiin Secretary chuan Film siamtute leh thangthar Film Industry lama luh tum te chu an huang zauh turin a chah a. ESM te hmalakna chu chhuanawm a tih thu sawiin, Pi Betsy Zothanpari Sailo chuan Film-Fest 2026-in Short film leh Documentary Film lam a ngai pawimawh chu tha a tih thu a sawi a ni.

Film tha siam tur hian hnam dang leh ram dang ngai lovin Mizoram chhungah hian khawvel hmaa pho lan tlak thil thar leh tha zawk tam tak a awm, Secretary chuan a ti a. Heng kan hmunhma neih te hi phochhuak tam turin Mizoram film industry lama inhmang te a sawm a ni. Khuallian chuan Film lama hmasawnna turin kumin March thla khan Lemchan - Film Festival pawh I&PR buatsaih a neih a loh ni tawh thu sawiin, heng hun te hi film lama tuimi te tan inpho chhuahna leh an thiamna tihpunna hun remchang a ni, a ti.

ESM Chairman B. Lallawmkima chuan kalkhawmte lawmna thu sawiin, he fest buatsaih tura hmalatu pawimawh I&PR Directorate a fak a. Mizo Film industry chuan hlawhtlinna tam tak an chhar tawh karah tih tur hmabak tam tak an la nei tih sawiin, hmalam pana ke pen turin kalkhawmte chu a sawm a ni.

Film-Fest 2026 hi August ni 13 leh 14 chhung neih a ni dawn a. He ni hnih chhung hian film lama mi thiamte nen zirhona hun Master Class buatsaih a nih dawn bakah a duh apiangte en theih turin Mizo film-te tihchhuah (screen) a ni bawk ang.