3094/2023-2024

Aizawl, the 18th December, 2023: Vawiin chawhnu dar 1:00 khan Information & Public Relations (I&PR) Minister Dr. Vanlalthlana chuan a Pisa, MINECO ah I&PR Department hotute kawmin hmalakna leh hmachhawpte a sawipui.

Dr. Vanlalthlana chuan a enkawl Department hnuaia thawktute leh hnathawhte a hmelhriat chhoh mek zel thu sawiin, Department hotute chu hmasawnna tura tulte inhrilhhriat leh infinchhuah kawngah inthlahrung hauh lova thurawn pe zel turin a fuih a. Thawhhona tha tak neih a beisei thu sawiin, I&PR Department chu Sawrkar thuchhuah mipuite tana hriattur tulte puangzartu leh zirtirna petu pawimawh tak a nih avangin thawktute chu inthlahdah lova ram leh mipui rawngbawl kawnga thahnemngai taka thawk turin a chah a ni.

I&PR Minister chuan Sawrkar thuchhuahte puanzar nana website leh social media platform hrang hrangte I&PR Department-in tha taka a enkawl chu lawmawm tiin chhawmnun zel bakah hmasawnna turte pawh ngaihtuah zui a tul thu a sawi a. Department hotute chu Sawrkar duhdan angin Office inkaihhruaina Dan te tha taka zawm a nih theih nana hma la turin a chah a, chhan leh finfiahna tha tak awm lova aikal lak bakah lirthei kawl theih chin bak kawl chungchangte ngaipawimawh turin a chah bawk a. Office cheibawl leh thawmthat a tul hunah tualchhung thil siam leh mizo kutchhuak ngeite hmang hram hram turin a chah a. Department hotute atanga mamawh leh tul thlente chu sawifiahna tha tak nena a remchan anga bawhzui zel tum a ni, a ti a. Mizoram dinhmun leh hmasawnnate, State pawn lam mite tana entawntlak chindan tha leh mawite tarlan tam deuh deuh a pawimawh thu a sawi a. Ram leh mipui tana rawngbawl kawngah rinawm leh dik taka hmalak a nih theih nana theihtawp chhuaha hmalak ho zel a tul thu a sawi bawk.

He hunah hian I&PR Secretary Pi H.M. Hualsangi, Director Pu C. Lalnunkima leh Senior Officer-te hnen atangin I&PR Department kaltlanga hmalakna tlangpuite leh hmachhawpte ngaihthlak a ni a. Minister thar duhsakna hlanin a kaihruaina hnuaia hmalak phurawm an tih thu an tarlang bawk.

Vawiin I&PR Minister leh Department hotute meeting-ah hian khawvel changkang leh hmasawn zelah media hrang hrang kaltlanga hmalakna rang taka hmuh leh hriat theiha a awm tawh thu tarlan niin, Nodal Department nihna anga hmalak tulte pawh ngaihtuahho a ni a. Thlalak hlu tak takte nakin zel atana awlsam zawka enlet leh theih tura tha taka vawnhim a nih theih nan documentation leh archive tihchangtlun dan turte pawh sawiho a ni a. Mizoram State Wall Calendar 2023 leh Diary-te tunkar tawp lamah chuan a rawn thlen hman beisei a nih thu tarlan a ni a. District leh Directorate hnuaia infrastructure neih dante, thawktu neih dante bakah pawimawh dangte sawi ho a ni bawk.