1806/2024-2025

Aizawl, the 29th August, 2024: Mizoram Information Service (MIS) Officer-te tana buatsaih ni 2 awh tur, In-House Training programme chu vawiin chawhma dar 9:30 khan I&PR Minister Dr. Vanlalthlana'n I&PR Conference Hall, Lianchhiari Rûn, Aizawlah a hawng.

A hawnna hun I&PR Director Pu C. Lalnunkima kaihhruaiah Dr. Vanlalthlana chuan MIS Officer-te puala In-house training buatsaih a ni chu lawmawm a tih thu sawiin, training hi intuaitharna leh thil lo thleng turte tha taka lo hmachhawn thei tura inpuahchahna hmanraw tangkai tak a ni, a ti a. Department hotute ruahmanna fakawm a tih thu sawiin, training-a tel MIS Officer-te chu tunlai thiamna chhuak tharte ngaihvena, chhawr tangkai thei tura insiamrem thiam tur leh Sawrkar duhdan leh hmachhawpte hlenchhuah a nih theih nana ngaihtuahna seng turin a chah a. MIS Officer-te tana training changtlung zawk neih dan turte pawh buaipui mek a nih thu sawiin, hemi kawngah hian infinchhuaha thurawn pe tam turin kalkhawmte a sawm a. Hmasawn turin phurna leh zirchian peihna rilru put hmasak a pawimawh thu tarlangin, ram leh hnam tana thil tha nia an hriatte ngun taka zirchianga huaisen taka kalpui ngam turin a fuih bawk.

ICT Minister ni bawk Dr. Vanlalthlana chuan optic fibre hmangin District Hqrs-te internet chak zawk pek tuma hmalak mek a nih thu leh hemi hmang hian mipuite'n information an dawn zung zung theih beisei a nih thu sawiin, information tha mipuite'n an hriat vat hi thutlukna tha leh dik siam kawnga pui theitu pawimawh tak a ni, a ti a. News bakah scheme tha tak takte leh thuthar, mipuite hriattir nghal thuai ngaite puanzar kawngah tunlai thiamna tun aia nasa zawka chhawr tangkai a tul tih sawiin, MIS Officer-te chu hemi kawngah hian ngaihtuahna senga tanlakpuiah a sawm a. Social media kaltlanga thu belhchian dawl lo leh mipuite tichiai thei vawrhdarh a nih changa mipuite ngaihven ber chu Sawrkar thu leh hla  puangtu I&PR thuchhuah a nih thu sawiin, mipui hriattur angte puanzar kawngah media platform hrang hrangte tangkai taka hmang chhunzawm zel turin a chah a; Sawrkar thuchhuake chu rintlaka ruat a nih avangin dik leh felfai taka ziah tum turin a fuih bawk. 

He hunah hian I&PR Secretary Pi Betsy Zothanpari Sailo, District hrang hranga MIS Officer-te bakah Directorate of I&PR hnuaia MIS Officer-te an tel a ni. 

Ni hnih chhung awh 'In-House Training for MIS Officers' ah hian sawm bik mithiamte'n MIS Officer-te tana hriattur pawimawh hrang hrangte bakah Office hna kentel tul hrang hrangte an  zirtir dawn a. Vawiin training-ah hian resource person 4; Pi Mina Zoliani, DD (Hqrs), Pu Malsawmsanga, DD (Gen), Pu Pratap Chhetri, DD (Plang) leh Pi Lalawmpuii, Superintendent, Directorate of I&PR te'n topic hrang hrang Advertisement Rules, Mizoram Journalists' Welfare Society, Mizoram Journalists' Pension Scheme, Press Clipping, RTI, Citizen's Charter, Right to Public Services Act, Establishment Matters, Roles & Responsibilities of DDO leh Accounts matters chungchang zirtirna an pe dawn a ni.

Training hi naktukah chhunzawm tur niin, resource person 5; Pu L.R. Sailo, MIS (Rtd.), Former Director, I&PR & Press Secretary to CM,  Pi Lallianpuii, MIS (Rtd.), Former Director, I&PR, Pu Adam Saprinsanga, Editor, The Frontier Despatch, Dr. Irene Lalruatkimi, HoD, Dept. of Mass Communication, MZU leh Dr. Lalremruati, Asst. Prof, Dept. of Psychology, GAWC te'n topic hrang hrang Public Relations, Press Release, Govt-Media Relations, Social Media & Fake News leh Mental Health at the Work place tih thupui hmangtein zirtirna an pe dawn a. I&PR Secretary Pi Betsy Zothanpari Sailo hovin naktuk chawhnu dar 3:30 hian training kharna hun hman a ni ang.