3291/2023-2024

Aizawl, the 9th January, 2024: Vawiin chhun dar 12:00 khan I&PR Minister Dr. Vanlalthlana hovin I&PR Auditorium-ah kumthar inhlantharna leh thingpui inhona hun hman niin, he hunah hian Mizoram Journalists' Association (MJA) member-te leh Directorate of Information & Public Relations, Aizawla Officer-te an tel a ni.

He hun hmanpuitu I&PR Minister Dr. Vanlalthlana chuan MJA leh I & PR a thawkte chu kumthar duhsakna hlanin Mizorama chanchin lakkhawm leh thehdarh khawvelah tun hmain lemziak cartoonist angin a lo in hman tawh dan te sawiin, in zingah ka mikhual lo hle a ni, a ti. Sawrkar reng reng veng thei tu leh khalh ngil thei ber chu opposition party-te leh chanchinbu mi media kan tih mai te an ni a, a bik takin ram siamthatna kawngah te, ram vei kawngah te, journalism leh journalist te hian dinhmun pawimawh tak in luah a, chumi hre reng chungin ka thawhpui, kan chanchinbu mite leh thuthar te hi Sawrkar min venpuia thurawn te min pe turin ka chah duh che u ani a ti.

Thuthar lakkhawm chungchang sawiin Minister chuan investigate journalism ah te tan lakna tur a awm thu te, RTI hman tangkai leh zual dan kawng dap a tul thu te, tunlai journalism a thil thar data mining leh data journalism chungchanga hma thar lakna tur a awm thu te a sawi lang a. Pawl leh Sawrkar Press Release bakah mahnia chanchin thar leh thu thar lakkhawm peih a ngaih thu sawiin hemi kawngah hian tan la leh zual turin ka chah duh che u a ni a ti bawk.

Dr. Vanlalthlana chuan chanchinbumi ten Mizoram Journalist Welfare Fund leh Press Tour te an tangkaipui chu lawmawm tiin Welfare Fund hi indaih lohna a san avangin nuai 20 atanga nuai 25 a tihpun rawt mek a nih thu te, Press Tour te buatsaih leh dan kawng ngaihtuah a nih tur thu te leh journalist te tana pension scheme Sawrkar hmasa in a rem tih tawh te chu a taka hman a nih tur thu te a sawilang bawk a ni.

He hun kaihruaitu I&PR Director Pu C. Lalnunkima chuan I&PR Minister thar hova inhlantharna leh thingpui inhona hun tha tak hman a ni thei chu lawmawm a tih thu a sawi a. A kaihruaina hnuaiah hmasawnna rahbi thar leh duhawm tak hmuh ngei a beisei thu a sawi bawk.

Thusawitu dang MJA Gen. Hqrs. President Pu C. Lalrambuatsaiha chuan kalkhawmte chu rilru leh ngaihtuahna thar nena kum bul tana hmasawn tuma ngaihtuahna seng turin duhsakna a hlan a. Democracy rama Press mite pawimawh dan leh an tana hamthatna awmte tarlangin, Minister leh Department hotute chu chak leh awmze nei zawka bawhzui a nih theih nana theihtawp chhuahpui turin a ngen a. Sawrkar hmalakna mipui hnena puanzar kawngah theihtawp chhuah an inhuam thu sawiin, ram leh mipui rawngbawl sak kawnga sawrkar tana mi tangkai an nih theihnate hriat saka hman tangkai tum turin a sawm nghal bawk.

Vawiin I&PR Officer leh MJA member-te puala inhlantharna leh thingpui inhona hun hmanah hian Pu F. Lalfakzuala, Jt. Director, I&PR Department-in hunserh hmangin Pi P.B. Lianthangpuii, Jt. Director, I&PR Department-in lawmthu sawiin inhlantharna leh thingpui inhona hun hman hi a khar a ni.

Programme zawha Minister hian I&PR Directorate Office bulah sak thar leh luahluh tawh building thar Lianchhairi Run a fang leh a ni.