3290/2023-2024

2024 Pawlkut thla ni 9: India Sawrkar Laipui ruahmanna hrang hrangte a dawngtu tur dik takte'n a hun chhunga an dawn a, a nih dan tur taka an kalpui theih nana India ram puma inzirtirna, Viksit Bharat Sankalp Yatra (VBSY) kalpui mekah Mizorama kalpui a nih dan a hmuna enfiah tura lo kal, Mizoram State Prabhari Officer Pi V. Hekali Zhimomi, IAS, Additional Secretary, Ministry of Health & Family Welfare hovin vawiin khan Kolasib District chhunga khaw pahnih - Gosen Veng leh New Builum-ah te VBSY hnuaia thil pawimawh hrang hrang inzirtirna hun hman a ni.

State Prabhari Officer Pi V. Hekali Zhimomi chuan sawrkarin khua leh tuite tana ruahmanna ṭha tak tak a siamte chu a chhawrtu tur mipuite'n an hriat loh avanga a nih tur ang taka hlawhtling zo lo a awm ṭhin tih sawiin, he'ng ruahmannate hi a chhawrtu tur zawng zawngin an hriat ngei theihna turin Prime Minister Pu Narendra Modi hma laknain VBSY chu India ram pumah kalpui mek a ni a, sawrkar ruahmannate mipui zirtira hrilhfiah turin VBSY Mobile Van chu khaw tinah tirh a ni, a ti a. Khaw mipui kal khawmte chu line department hrang hrangte'n thil pawimawh an rawn hrilh leh ṭanpuina dawhkan (helpdesk) an rawn hun te, hriselna endikna (medical check up camp) an buatsaihte chu chhawr ṭangkai tum ṭheuh turin a chah a ni.

VBSY puala hun hman hi Kolasib District Deputy Commissioner (Bawrhsap) Pu John LT Sanga'n a kaihruai a. State Prabhari Officer leh kal khawmte lawmna thu sawiin, sawrkarin mipuite tana ruahmanna ṭha tak tak a duante chu Kolasib District mipuite'n mahni, chhungkua leh ram hmasawn nan chhawr thei tura ṭan lak a pawimawh a ni, a ti.

Kolasib Gosen Veng leh New Builum-a VBSY hun hmanah hian line department hrang hrang ai awhte'n an department hnuaia sawrkar ruahmannate an sawi fiah bakah, beneficiary-te hnen aṭangin scheme an hlawkpui dan ngaihthlak a ni bawk a. Lo neitu ṭanpuina Pradhan Mantri Kisan Samman Nidhi (PM-KISAN) leh lo neitu insurance Pradhan Mantri Kisan Maandhan Yojana (PMKMY) chungchang te, social security scheme chi hrang hrang - Pradhan Mantri Suraksha Bima Yojana (PMSBY), Pradhan Mantri Jeevan Jyoti Bima Yojana (PMJJBY) leh Atal Pension Yojana (APY) chungchang te, chhungkaw khawsak harsate tana a thlawna gas connection pekna Pradhan Mantri Ujjwala Yojana (PMUY) chungchang te, lo neitute tana loan pung tlem chi Kisan Credit Card (KCC) loan lak theih dan chungchang te inzirtir a ni a. Khawlthlawkthei (drone) hmanga lei ṭha leh hlo pek dan leh lei ṭhat dan endik theih dan te a taka entir (demonstrate) a ni a. Line department hrang hrangin a mamawhte ṭanpuina dawhkan (helpdesk) hungin, medical team-te'n natna chi thum - ngawr (TB), zunthlum leh thisen sang te a thlawna endikna, VBSY medical check up an buatsaih bawk a ni.

Gosen Veng leh New Builum-a VBSY puala hun hman zawh hian VBSY State Prabhari Officer Pi V. Hekali Zhimomi chuan Kolasib DC Conference Hall-ah line department leh department hrang hrang hotute nen meeting a nei zui nghal a. He hunah hian Kolasib District-a VBSY kalpui mek thlir ho niin, hma lak zui zel dan tur ruahman a ni a. Kolasib District chhunga hriselna lam dinhmun hrang hrang leh hmasawnna turte sawi ho a ni bawk.

Ministry of H&FW-a Additional Secretary Pi V. Hekali Zhimomi hian vawiin chawhma lam khan District Hospital Kolasib chu tlawh bawkin, an dinhmun a enfiah a. OST Centre, Casualty/Emergency Room, Laboratory, ICTC leh Art Centre te a hmunah enfiahin, thawktute nen an mamawh hrang hrang leh hmasawnna turte an sawi ho va. HIV/AIDS laka invenna chungchangah te, a veite zawn chhuah leh enkawlna kawngah te ṭan lakna tur hrang hrang sawi ho niin, Kolasib District-in hriselna kaihhnawih hmanraw ṭha leh changtlung zawk a neih theih nana hma lak dan tur te an sawi ho bawk.