No.7891/2020-2021

Lunglei, 23rd March, 2021: Vawiin khan Convention Centre, Lunglei-ah Mizoram Journalists Association (MJA) General Conference vawi 47-na ropui taka hman a ni a. I&PR Department changtu Minister Pu Lalruatkima chu khuallian niin Vice Chairman HPC Lunglei Pu Lawmawma Tochhawng chu khualzahawm a ni. MJA General Conference vawi 47-na ah hian MJA member mi 100 an kalkhawm a. Hemi bakah hian Lunglei DC Pu Kulothungan A leh District official-te, MJA Advisor-te leh sawm bik dangte an tel a ni.

He huna Pu Lalremsiama, Vice President, MJA General Hqrs kaihhruaiah khuallian Pu Lalruatkima, I&PR Minister chuan MJA ten an General Conference vawi 47-na an hmang chu duhsakna hlanin, mipui rorelna sawrkar democracy ah Journalist te chuan hmun pawimawh tak luahin ram hmasawnna mawhphurtu pawimawh berte zing ami an ni, a ti a. Sawrkar hmalakna hrang hrang puanzar kawngah leh Sawrkar finchhuah kawngah media mi te chu kawng tinrenga thawhho pui a duh thu sawiin a tha zawnga mipuite kaihruaitu leh ram hmasawn zelna tura kawng kawhhmuhtu ni zel tura tan la turin a chah a. Ziakmite chu kan ram tan mi pawimawh tak an ni tiin chanchinbu mite chu thu leh hla hmanga kan ram leh hnam humhalha hma la thintu, kan tawng a bo mai loh nana vawnhim kawngah te leh ziaka thil tam tak min chhinchhiah sak thintute an ni, a ti a. Kan mizo thalai tam tak social media leh online games-te buaipuia lehkha chhiar nachang an hre tawhlo chu pawi a tih thu sawiin lehkha chhiar uar tura infuih turin theihtawpa tan kan lak tlan a tul a ni, a ti a.

A sawi zelnaah Minister chuan Mizoram media ti hmasawn tur leh journalist-te hamthatna chungchang ngaihtuahin I&PR Department chuan theihtawp a chhuah mek thu a sawi a. September 2019 khan India ram rorelna sang ber zirchiang turin New Delhi-a Bureau of Parliamentary Studies and Training (BPST), Lok Sabha Secretariat ah journalist leh I&PR thawktuten training an neih thu sawiin he training thawh hnihna hi kumin May thla ah neih chhunzawm anih tur thu a sawi a.  Journalist pension scheme ti hlawhtling tura thui taka hmalak anih tawh thu sawiin I&PR Minister chuan he scheme hi tih puitlin thuai a beisei thu a puang a. Press Enclave ti hlawhtling tur pawhin NEC ah thlen anih tawh thu a sawi bawk.

He huna khualzahawm Lunglei HPC Vice Chairman Pu Lawmawma Tochhawng pawhin thu sawiin ram changkang apiangah ziakmiten ngaih pawimawh leh ngaihsan an hlawh a ni, a ti a. Mizo tawng ziak dan dik  inzirtir kawngah pawh tan kan lak thar a ngaih thu sawiin media-te chu hemi kawnga mawhphurna nei lian berte zing ami an ni, a ti a. Lunglei High Powered Committee (HPC) leh MJA ten kum tam tak kalta atanga thawhhona tha tak an lo neih tawh chu chhawmnung zel turin kalkhawmte tanrual puiah a sawm a ni.

Vawiin program ah hian MJA chuan Prominent Journalist atan mi pali a puang thar a ni:

1.     Pu K.Sapdanga, Editor & Publisher, Vanglaini Nitin Chanchinbu,

2.     Pu C. Dinthanga, Editor & Publisher, Lelte Weekly,

3.     Pu C. Lalzamlova, Editor & Publisher Chhawrpial

4.     Pu B Dawpho, Editor & Publisher, The Times of Maraland 

Mizoram Journalists Association (MJA) General Conference vawi 47-na ah hian Pu Lal Rinmawia, Secy MJA gen Hqrs leh Pu H. Lalthansanga, President MJA Lunglei District ten inlawmna thu sawiin PuZohmingmawia, Gen Secy MJA Gen Hqrs in General Report pein Pu C.Lalhmachhuana, Treasurer MJA Gen Hqrs in Finance Report a pe a, Pu Zonunsanga Khiangte, President MJA Gen Hqrs chuan Presidential Address a sawi bawk. Chawhma hun neih hnu hian chawhnu lamah rorel inkhawm an nei zui a ni.

Mizoram Journalists Association (MJA) General Conference vawi 47-na hmang tura lo kal chanchinbumite hian naktukah Lunglei hming put chhan Lung-Lei leh Engineering College, Pukpui-te an tlawh hnuah anamahni District lam panin an haw leh dawn a ni.