Vawiin chawhma dar 11:00 khan Serchhip Heritage Society (SEHSO) buatsaihin Serchhip P&E Veng YMA Hall-ah Serchhip Heritage Day hman a ni a. Pu Lalruatkima, Minister I&PR chu khuallian niin, Bialtu MLA Pu Lalduhoma chu khualzahawm a ni.

Khuallian Pu Ruatkima chuan SERCHHIP (a brief history) lehkhabu K. Remruatfela ziah chu tlangzarhin, Mizo history kan hriat dan leh kan pawm danah kawng dik zawk min kawhmuhtu tur lehkhabu tha tak anih a beisei thu a sawi a. History hi ziah nawn a lo ni fo tawh thin a, a ziaktuten awn lam neiin an duh lam an hawi fova, he lehkhabu erawh hi chuan behchhan tha tak neiin lehkhabu changtlung tak, midang pawhin hnial tum mahse dingchang tlat thei tur history tha tak a tarlang nia a hriat thu a sawi a. Mizo history hi Zoluti avangin nasa takin a danglam a, Zoluti rawn luhna ram neitu Serchhip leh a chhevel atangin History-ah hmasawnna nasa tak kan nei ani tih a ti lang a ni, a ti.

Tunlaiah mahni hnam thil ngaihsan lohnain min chiah nasa hle a, kan tawng a dal tial tial a, kan nau awihna hlate thlengin kan thlak danglam mek a ni a. Kan hnam ziate hlut thar leh turin thangthar ten mawhphurhna pawimawh tak kan nei a ni tih kan hriat ka duh a. Lehkhabu ziah te, chhiar te uar deuh deuh ila, kan tawng a boral loh nan ziak mite ngaihlu thiam ila, an lehkhabu ziahte pawh i chhiar tam ang u, tiin kakhawmte a chah a ni.

Khualzahawm Pu Lalduhoma pawhin thusawiin, Kawlri tlang leh En tlang chu Heritage Centre lian tak atana buatsaih tum niin, cheng vaibelchhe 15 man vel Project buaipui mek anih thu a sawi a, Mizoram University a mithiam 11 ten he project tur hi an buaipui mek a ni, a ti.

He hunah hian Pu Lalrinthuama Kawlni, President, Serchhip Heritage Society (SEHSO) chuan Serchhip Heritage Society (SEHSO) dinchhuah a nih dan sawiin Serchhipa pi leh pute hmun hlui pawimawh awm te a riral mai loh nan a, thangtharte hmuh theih tura vawn him zel an tum thu a sawi a ni.

Vawiina Minister in a tlangzarh lehkhabu, Serchhip (A brief History of Serchhip) ziaktu Pu K. Remruatfela hi thiamna lamah MA, LL.M a ni a. A lehkhabuah hian Serchhipah Sailo lal ropui Lallula a lo chen tawh thu te, chhim leh hmar indo vanga ro an phumrukna puk chanchinte, Zoluti mantu chu Pasaltha Chawma a nih thu leh a enkawl zo lova a hriat avanga lal Bengkhuaia hnena a hlan tak thute a sawi a. Serchhip leh a chhehvel chanchin hlui ngaihnawm tak tak engemaw zat a ziak a ni.

Serchhip Heritage Day hmanna hi Pu Zohmangaiha Ralte, Chairman Joint VC Serchhip chuan a kaihruai a, Serchhipa tlawmngai pawl hrang hrangte aiawhte leh zirlai naupangte an tel a. Pu Liansanga Hnamte, Chairman SVWC, Aizawl chuan lawmthu sawiin hun a khar a ni.