Vawiin chawhnu khan Health and Family Welfare Minister leh Health and Family Welfare Board Chairman Dr. R.Lalthangliana hovin Health and Family Welfare Board Member te a vawi khatna a tan ama Office Room, Mizoram Secretariat Complex, MINECO-ah meeting an nei a, meeting-ah hian Board Vice Chairman leh Champhai North Bialtu MLA, Dr.Thiamsanga pawh a tel a ni.

Chairman Dr.R.Lalthangliana chuan Health Care System tha leh changtlung tak Mizoram in a neih theih nan, Board Member te chu an ngaihtuahna te seng a, hmalakna dan tur sawi ho a, zir ho turin a sawm a. Hmasawnna thar, rahbi thar la turin Board Member te a fuih bawk a ni. Chairman chuan khawvel hmasawnna tehna hi hriselna-ah niin, tun hnaiah NITI Aayog Health Index, 2019 ah state te zingah Mizoram pakhatna a ni chu thawktute thahnem ngaihna leh inpekna zarah a ni, a ti a. HIV+ leh Hepatitis C vei an lo pung zel erawh chu a lung a chhiat thlak a ni, tiin a sawi a ni. Health Care System hlawhtlinna chu mi hnuaihnung leh harsa zawk ten an hman tangkai theih tura ruahmanna tha neih hi a ni, tiin a sawi bawk a ni.

Health and Family Welfare Board Member te inhmelhriat tirna neih a ni a, Board in hma a lakna tur sawi leh thlirho a ni a, September thla-ah meeting nei tura rel a ni bawk a ni.

Meeting ah hian Secretary, H&FW Department, Pu H.Lalengmawia, Principal Director, Dr. F.Lallianhlira, Director, H&ME Dr.Lalhmangaihi, Director, Health Services, Dr.Lalchungnunga leh midangte an tel a ni.