Vawiin hian Pu C. Lalrinsanga, Minister, Agriculture, Irrigation & Water Resources, Co-operation Department, chuan Serchhip sira Mat Lui kama buh leh thlai dangte chinna hmunpui, Zawlpui zau leh a chhehvel ram te tlawhin loneitute nena inkawmna hun a hmang a. Mat Irrigation Project hmun hma te a tlawh nghal bawk.

Zawlpui-a Agri & Horti Society te thlama loneitute nen inkawmna hun an neihnaah Minister chuan, kan ram tana ka rualawh em em na chu kan tharchhuah ve theih reng thlai chi hrang hrangin kan tapchhak leh kan chawhmeh bawm a luah tam lutuk tihreh hi a ni a. Kan thar ve theih reng chawhmeh state dang atanga kan chawlut nasa lutuk hi a rilru nat thlak a ni, a ti. He harsatna tireh tur hian kan ngaihtuahna kan sen thar a tula, hnam dang ram dang mite thil siamsa zawrh chhawn ringawt ngaihtuah lova a tharchhuaktu, a siam chhuak vet u nih tum zawnga inelna kan neih a tul hle a ni, a ti. Minister hian kan ei nasat ber buhfai thar tam kan mamawh thusawiin, buhfai phurh kual velnaah hian sawrkar sum luangral a tam lutuk a, hei hi kan tibo vek thei lo anih pawhin nasa taka kan tihhniam a ngai, state dang atanga buhfai kan chawkluhte tiphai kawk thei tura keini lamin a tharchhuah lama tan kan lo lak a ngai a, chumi ti thei tur chuan buh chin theihna ram kan kan la neih te mumal leh fumfe taka hriat hmasak kan mamawh hle a a ni. Agriculture Department a thawktute pawhin kan mawhphurhna pawimawh zia hriain iptepui aka hnathawk thin tur kan ni tih kan hriatreng a tul a ni, a ti. Serchhip District chhunga Oil Palm chingtute harsatna pawh a hriatpui thusawiin, Bukvannei lamah Godrej Company in Mizoram thar zawng zawng lei an inhuam a, anni hnena hralh zel dan tur ruahmanna a ngaihtuah nasat thu leh a hlawhtlin ngei a beisei thu a hrilh a ni.

Pu C. Lalrinsanga hian Zawlpui leh a chhehvel zau hrang hranga thlai chingtute harsatna sawi te chu chipchiar takin a ngaihthlak sak a. Han tlawh nghal mai theih hmunte tlawhin Chawm kaia Mat lei dawhna tur hmun pawh a tlawh nghal a ni.

Loneitute nena an inkawmnaah hian Pu K. Laltlanmawia, SMS chuan Serchhip District chhunga buh thar dan leh mipui mamawh tlangpui report a pe a, Serchhip district ah hian WRC farmer 2040 awmin, WRC leh Tlangram lo atangin buh 74870 qtls tharchhuah a ni a, ram 4236 ha a zauvah buh chin mek a ni. Chutihlaiin District in kum khat chhunga buhfai a mamawh chu 106600 Qtks a nit hung a. Tun dinhmunah Serchhip district hian a mamawh buhfai 60% a thar chhuak mek a ni. Ram 1510 ha vela zauva chin belh leh chuan mamawh zat thar theih inbeisei a ni a, chutianga zau buh chin theihna hmun chu a la awma ngaih a ni.

He inkawmna hi Pu C. Lalnithanga, DAO Serchhip in a kaihruaia,  Minister tawiawmtu Pu Lalrotluanga, Chief Engineer, Irrigation & Water Resources Development pawhin thusawina hun a hmang bawk. Pu C. Lalrinsanga’n zawlpui leh a chhehvel a tlawh kualnaah hian Serchhip bialtu MLA Pu Lalduhoma pawhin a rawn tawiawm a ni.

Zawlpui leh a chhehvel a tlawh zawh hian Minister hian Serchhip leh Thenzawl inkar kawngpui kama thlai chinna hmun Zuangleng zau a tlawh leh nghal a, chumi dawtah Mat Irrigation Project, Irrigation & Water Resources Department in a thawh tawh hmun te tlawhin, hmabak ruahmanna awm te a enpui nghal bawk a ni.