Vawiin chawhnu hian Pu Lalruatkima, Minister of State, Rural Development, I&PR, etc, chuan Serchhip DRDA Conference Hall ah Serchhip a Rural Development Department a thawktute nena inkawmna hun a buatsaih a. An mamawh leh harsatna te a ngaihthlak sak.

Minister chuan, RD Deparment chu Department lian tak, state sawkar sum aia Central Sponsored Scheme te khawih nasa zawk a nih thu a sawi a. Sawrkarna an siam hnua RD Department engemawzat a tlawh tawh thusawiin, a theih chuan tlawh vek a duh thu a tarlang. A hmuna engkim hmuhpui ngei hian kan mamawh leh harsatna te kan chiang bik thin a ni, a ti. Minister chuan MGNREGA hnuaiah kum khata ni 150 inhlawhna tur Central sawrkara a lo zuk dil tawh thusawiin, kumin bikah ni 56 inhlawhna pek chhuah a nih tawh thu a sawi a. Ni za inhlawhna hi Village Asset siam nana a tam thei ang ber hman a that thu sawiin, thawktute chuan hna tha, mawi leh tlo tak thawh ngei kan tum tur a ni, a ti. Chutiang chuan tun hmain kan lo ti ngailo a nih pawhin vawiin atang chuan chutiang chuan hna thawh kan tum tawh tur a ni, tiin thawktute a fuih a. Village Level Assistant, chhawr tlak vak loh an awm tih a hriatpui thusawiin, mi chawthleng ben buak chu hreh hle ma hila, khawngaihna hun kan siam sak chhunga an insiamthat siloh chuan, thawk thei kan indah mai a ngai dawn a ni, a ti a ni.

Pu Lalruatkima hian PMAY lama harsatna awm te sutkian tuma theih tawp chhuah a nih thusawiin, kumin Fund phei chu tihfel tep tawh a ni tih a sawi a. CM Rural Housing Scheme erawh chu chhunzawm loh mai thaa a hriat thu a sawi bawk. DRDA thawktu, hlawh la lova rei tak lo awm tawh te a lainat hle tih sawiin, tha taka hlawh an lak theih nan Finance lam hotute a lo sawipui tur thu a hrilh a ni. Minister hian Rural Department a thawktute chuan ram tan hna pawimawh an thawk a ni tih inhriain an theih tawp chhuah turin a ngen a ni.

He hun hi Pu H. Dolianbuaia, Project Director, DRDA chuan a kaihruaia, Pu  CC Lalchuangkima, Deputy Secretary, RD leh midang te pawhin thusawina hun an hmang bawk a ni.

Attachment

  • Loading attachment...