Vawiin khan Lal Thanhawla Auditorium-ah Ministry of Information & Broadcasting (I&B) hnuaia Children’s Film Society of India (CFSI) leh District Administration, Aizawl tangkawp buatsaih ni thum awh tur Children’s Film Bonanza chu I&PR Minister Pu Lal Thanzara’n a hawng.

Pu Lal Thanzara chuan tunlai khawvel changkanna in a ken tel technology sang zelah naupangte pawhin mobile leh computer an khawih nasat phah a, naupanlai hun hetiang ringawta an hman loh nan tan kan lak a ngai a ni tiin hemi kawnga hmalakna pakhat chu film festival huaihawt hi a ni, a ti a. Nu leh paten kan fate TV –ah enge an en, mobile leh computer-ah enge an khawih tih kan hriatpui a ngai a ni, a ti a. Film hi naupangte tan zirna kawngah te, hnam ziarang leh nunphung hriatna atan te hman theih a ni tiin thil tangkai tak tak inzirtir theihna hmanrua a ni, a ti a. Kan ram ngeiah pawh naupang film siamtu leh buaipuitu kan awm chho ta hi hmasawnna tha tak a ni tiin tun hma pawhin naupangte tan film festival hlawhtling takin neih a lo ni tawh thin a ni, a ti a. Tun tuma film festival pawh hian rah tha tak a neih ngei a beiseiawm a ni, a ti.

Children’s Film Society of India (CFSI) CEO Pi Swati Pandey chuan naupangten zirtir nei tha tak tak film an en theihna tur film festival buatsaih a ni chu lawmawm a tih thu sawiin hemi hlawhtlinna atana buaipuitu zawng zawng chungah lawmthu a sawi a. CFSI-in film 270 vel film an neihah mizo tawnga lehlin film paruk (6) chiah a awm a, film tam zawk mizo naupangten an hriatthiam ngei theih nan lehlin tura hmalak a ni dawn a ni, a ti a. Hun hlimawm tak nei turin duhsakna a hlan a ni.   

Children’s Film Society of India (CFSI) hi kum 1955 khan din niin India ramah hian naupangte tana film siamtu lian ber pawl an ni a. India ram hmun hrang hrangah film festival buatsaih thinin naupangte tan film 270 vel tawng 15-a lehlin an nei a, khawvel pum huapin award pawh an lo la tawh thin a ni. Heng an filmte hi naupangte tana zirtir tha tak tak nei te, naupangten zau zawka thil an ngaihtuah theihna atana puitu te, naupang hriatna tipung theitu tur te an ni.

Aizawl DC Dr. A. Muthamma chuan kalkhawmte lawmna thu a sawi a. I&PR Jt. Director leh Films Development Nodal Officer Pi Lallianpuii chuan lawmthu sawina in hun a khar a. Aizawl DC office, School Education Department, I&PR Department hotute leh hnathawkte, Mizoram Film Forum bakah zirtirtu leh zirlai naupangte an tel a ni.

Vawiin chawhma khan Dawrpui Middle School, Govt. Khatla Nepali Middle School, Chhinlung Academy Middle School, Govt. Chhinga Veng Middle School ten ‘Kima’s Lode’ tih film an en anga, chawhnu lamah Govt. Bungkawn High School, Govt. Bethlehem VT High School, Govt. Pianghleia High School, Govt. KM High School ten ‘Gattu’ tih film an en leh ang. Chutiang zelin zirtawpni thleng hian zirlai naupangten film hrang hrang an en dawn a, zirtir tha tak tak nei an ni a, mizo tawnga lehlin vek niin tun film festivalah hian film paruk (6) naupangte en turin chhawpchhuah a ni dawn a ni.