India leh Myanmar sawrkar inremna Rih-Zokhawthar kana inkalpawhna ‘Agreement on Land Border Crossing with Myanmar’ hawnna hun chu vawiin chawhma khan Rih-Zokhawthar Border-ah neih a ni. Indo-Myanmar Border inkalpawhna hi Pu Salai Lian Luai, Chief Minister Chin State Myanmar leh India sawrkar aiawh Pu H.Rohluna, Commerce & Industries Minister, Mizoramte chuan Ribbon chepchatin an hawng a ni. He mi hnu hian mumal taka inkalpawhna tihhlawhtlinna leh entirnan Rih Sector Indo-Myanmar Border Trade Point Zokhawthar Bridge chu kein an zawh kai a ni.

Hemi hnu hian Land Custom Station Hall, Zokhawtharah inkawmna hun tawi buatsaih a ni a. Pu Salai Lian Luai leh Pu H.Rohluna te chuan India leh Myanmar sawrkar hmalaknaa ramri inkalpawhna tur inremna mumal tak siam ani chu lawmawm  an tih thu leh ram pahnihte inkara inlaichinna tha tak siamtu anih ngei an beisei thu an sawi a ni.

India leh Myanmar Sawrkarin tunhnaia ramri kana inkalpawhna kawnga inremna an siam ang chuan helai hmuna inkalpawhna atana hman mek ramri atanga aerial distance Km 16 in a huam chhung chu ram pahnih tan awlsam taka inkalpawh theih anih bakah he Border Trade Point kaltlang hian ram dangmite tan passport leh visa hmangin luh leh chhuahna hmun International Point atana ruat a ni a.  Tuntumah hian Sorkar laipui chuan Myanmar ram chhunga inkalpawhna siamna tur atana Lei pahnih Indo-Myanmar Friendship Bridge, Zokhawthar tihchangtlunna tur leh Myanmar ram chhunga Byawnu Luia Leidawh turte zirchianna leh endikna nei turin Central Road Research Institute mithiam a rawn tir a, a ni hian vawiin leh naktuk hian endik hna hi a thawk dawn a ni.

Chin State Chief Minister Pu Salai Lian Luai hi Chin State mipawimawh tak tak Minister Border & Security Affairs; Member of Parliament, Falam; Immigration Head; Chief Auditor General, DC Falam; Police Commissioner, Hakha leh official dangte’n an rawn tawiawm a. India ram aiawh Commerce & Industries Minister Pu H.Rohluna hi Pu Zothan Khuma, Commissioner & Secretary, Commerce & Industries; Pu J.Hmingthanmawia, Director, Commerce & Industries; Pu Liansangzuala Chhakchhuak, Addl DC Champhai; Pu Rajesh Kumar Consul, Consulate General of India, Sittwe; Pu GK Sahu, Senior Principal Scientist, Bridge Engineers and Structure Division, Central Road Research Institute leh District Official dangte’n an tawiawm a ni.