Nizan dar 7 khan All India Radio, Aizawl leh Mizo Zaimi Insuihkhawm (MZI) Gen. Hqtrs., Aizawl tangkawp chuan Mizoramin remna leh muanna a neih kum 25-na lawmna kal zelah \'Peace and Harmony\' tih thupui hmangin Vanapa Hall-ah Concert an buatsaih a. Information and Public Relations Minister Pu Zodintluanga chu khuallian a ni.

Pu Zodintluanga chuan Mizoramin hun khirh tak Rambuai paltlanga 1986-a remna thuthlung ziah a nih hnuah ram pawhin hmasawn chho zelin Mizo mipui te khawsak phung pawh a lo danglam ta hle a ni, a ti a. He remna leh muanna chhawm nung reng tur hian Mizo mipui tekanpawimawh takzet a ni, a ti. Minister chuan khawvel changkang tawh takah  kan rilru puthmang pawh tihdanglam a tul tawh tiin veng  bil leh chi binga inbawk hrang lova Mizo hnam inpumkhatna chhawm nung zawk turin a chah a. Remna leh muanna tichhetu nilova India khua leh tui tha, ram hmasawnna thlentu, a chhiat a thata mawhphurhtu an nih in hre theuh turin kalkhawm te a fuih a ni.

Additional Director Genneral, AIR leh DD (NER) Pu C. Lalrosanga pawhin thu sawiin zofate zinga talent nei tha te phochhuah leh chawilar te, Mizo pipu te hla leh rimawi humhalh leh chawisan te hi AIR leh DDK chuan a tum a ni, a ti a.  Mizoramin remna leh muanna a neih Silver Jubilee lawmna kal zela buatsaih he Concert hmang hianIndiarama remna ziak tawh zinga hlawhtling ber pawl hi pholan nawn a nih ngei a beisei thu a sawi bawk.

Peace and Harmony Concert-ah hian zai thiam lar engemawzatin tawng hrang hranga zaiin mipui te an awi a ni.