815/2023-2024

Aizawl 16th June 2023: Nizan khan Dawrpui Branch YMA ten YMA Day Vawi 88- na an lawmna kal zelah 'YMA Nite" chu YMA Indoor Stadium-ah hmanna an nei a, he hunah hian I&PR Minister bialtu MLA ni bawk Pu Lalruatkima chu khuallian niin a hmanpui.

Minister chuan Dawrpui Vengthar Branch YMA ten YMA Day vawi 88-pual a YMA Nite-an hmang thei chu thinlung takin a lawmpui tih a sawi a. Zosap Missionary ten kum 1935-a YMA an lo din khan hruaitu hmasa zingah Dawrpui Vengthar mi an tel thei a hei hi thil chhuanawm leh chhinchhiahtlak tak a ni, ati.

Pu Lalruatkima chuan nu leh pa leh aia upa zahna kawngah tan la thar turin kalkhawmte chu a fuih a. Nu leh pa te zah leh chawimawi thiam hi khawvela damreina leh malsawmna dawnna a ni tiin nu leh pa te thuawih kawngah hmasawnna nei theuh turin YMA te chu a chah. Aia upa te zahthiam hi pi leh pu te nun a thilpawimawh tak, khawtlang nun tinuamtu a ni thin a, tunlai thangthar zingah erawh aia upa zahna chu a tlahniam hle nia a hriat thu sawiin YMA chu aia upa zahthiam tura inzirtirna uar zawk a kalpui turin a sawm a ni.

Zirna hi hmasawnna thlentu pawimawh tak a nih avangin zirna ngaisang a, uar zawk a zirna kalpui chu a hun tawh takzet tiin Minister chuan ram leh hnam a him a, a dam theihna turin zirna chawisan kawngah theihtawp a tan la thar turin YMA hruaitu leh member-te a chah a. Kumin HSLC leh HSSLC result chhuakah Dawrpui Vengthar zirlaiten hlawhtlinna tha tak annei thei chu a lawmpui tih sawiin hlawhtlinna sang zawk an chang zel theih nan rim leh ngawrh zawk a bei zel turin a fuih a ni. HSLC leh HSSLC-a hlawhtinna changte hnenah hian 'Zirna Lamtluang' Lalhruaitluanga ziak chu a hlan nghal bawk.

Bualtu MLA Pu Lalruatkima chuan YMA chu tlawmngai pawl, tanpui ngaite tanpuitu, Mizorama pawl lian ber leh mitin tel theihna pawl a ni tih sawiin khawi hmunah pawh awm se YMA chu bel tlat turin kalkhawmte chu a sawm a. Chhiatni thatni lo thlen chang a khawtlang innghahna ber YMA hnathawh leh inpekna chu Zoram mipuiten an hrereng a, YMA chu vantlang mipuite thlamuanpui ber anih ang takin hmalam hunah pawh khawtlang nuam leh chhenfakawm taka siam zel turin YMA Member-te chu a sawm a ni. Dawrpui Vengthar ten YMA Day vawi 88-na an hman naah YMA thiltum te hrereng tura chahin khawtlang leh Mizoram nuam zawk siam turin YMA chu an kal zelna turah duhsakna a hlan nghal.

Khuallian chuan YMA ten an day puala intihsiakna an buatsaih- Essay, Painting leh Mobile photography-a lawmman dawngtute hnenah lawmman semna nei nghal a. YMA Day vawi 88-na Dawrpui Vengthar Branch YMA ten an hman lawmpui nan MLA Fund atangin Badminton Carpet pek annih tur thu tarlangin, thlanmual mitthi vuina leh motor dahna building sakna tur sawrkara thehluh tawh pawh chu a hlawhtlin ngei theihna turin theihtawp a chhuahpui tih sawiin kuminah hna tan hman beisei a ni, a ti.

Zanin YMA Nite-hmanna ah hian YMA Chanchinbu Editor-lo nitawh te, vengchhung mi chhuanawmte leh YMA denchhen a thisen pe te chawimawina hun hman nghal a ni.