814/2023-2024

Khawzawl, the 16th June, 2023: Deputy Chief Minister Pu Tawnluia, Tuichang AC bialtu MLA ni bawk chuan nimin khan Khawhai Branch YMA bakah Khawzawl Vengthar Branch YMA te buatsaih YMA Day programme chu khuallian niin a hmanpui.

YMA Day puala Khawhai Town Hall-a hun hmanah Khuallian Deputy CM Pu Tawnluia chuan YMA chu tlawmngai pawl nung tak, khawtlang innghahna leh rinrawl ber a nih thu sawiin, thalaite kuangkuahtu leh fuankhawmna ber hi sawrkar pawhin a ngaipawimawh em em a, YMA Day denchhena hmun hrang hranga hun hman a ni pawh hi a inhmeh hle a ni, a ti a. Hnam nun zemawi chhawmnungtu leh sulsutu an ni leh chhiat that nikhuaa tumah enhrang bik lova hma an la thin chu ropui a tih thu sawiin, he pawl zahawm tak thiltum tihlawhtling zel turin rinawmna, dikna, huaisenna leh tlawmngaihna kan chhawmnun zel a ngai a ni, a ti a. Mizo hnahthlak hnam, tlang hrang hranga awmte innghahna leh inpui Mizoram enkawl leh chawimawi kawngah thalaite'n mawhphurhna an neih thu sawiin, humhimna zawnga zohnahthlak min rawn pantute tuamhlawm leh kuangkuah kawngah theihtawp chhuah tlan zel a pawimawh a, hei hian hnam inpumkhatna leh inunauna nasa zawk a siam dawn a ni, a ti bawk.

Pu Tawnluia chuan sawi chhunzawmin, YMA leh Mizo hnam tih chu lakhran theih a nih loh thu sawiin, hnam rilru leh hmangaihna tak tak a awm loh chuan hmasawnna dik leh tlo a awm thei lo a ni, a ti a. Thalaite chu hmasawn zel thei tura rualelna dik neih tum tur leh thiamna neih belh zel tura ngaihtuahna seng zel turin a fuih a. Hnam ziarang leh nunphungte humhim zel tum tur leh zahpui lova ngaihlu deuh deuh turin a fuih bawk a. Zohnahthlak sahimna zawnga lokalte tuamhlawm kawngah sawrkarin theihtawp a chhuah thu sawiin, hemi kawngah hian kan zavaia tanrual a ngai hle a ni, a ti a. Thalaite chu taksa leh rilru hriselna ngaipawimawha infiamna kaltlanga taksa sawizawi uar deuh deuh turin a chah a. Bial chhunga hmasawnna ruhrel siam leh hmachhawpte tarlangin, thalai kalkhawmte chu bial leh khawtlang tihhmasawn kawnga theihtawp chhuahpuiah a sawm a ni.

Khawhai Town Hall-a YMA Day lawmna programme, nimin chawhma dar 10 a hman chu Khawhai Branch YMA Vice President Pu Thanhnuna'n a kaihruai a. Branch leh section report ngaihthlak niin member boralte sunna hun hman a ni a. Kum puan thupui ngaihthlak niin intihsiakna hrang hrang neih a ni bawk.

Hemi hnu hian Deputy CM chuan chawhnu dar 2 khan Khawzawl Vengthar Branch YMA buatsaih YMA Day pual thingphun hnatlang, Tuimuk lui bul NH-06 kawngpui kama neih chu khuallian niin a hmanpui bawk.

He hun Pu H.Lalrinawma, Vengthar Branch YMA President kaihhruaiah hian Khuallian Deputy CM Pu Tawnluia chuan thu sawiin, YMA Day pual thil tha tih lantirna thingphun hnatlang buatsaih a ni chu inhmeh a tih thu leh Khawzawl Vengthar Branch YMA in Tuimuk lui dung nungchate an humhalh tlat chu fakawm a tih thu a sawi a. Sawrkarin luidung nungchate bakah tui humhalh a duh thu leh tuihna humhalhna dan hman theiha a peihfel thu a sawi a. Sik leh sa danglam zelah tuihna a kiam ve zel thu sawiin, thalai rualte chu tuihna humhalh tura thingphun uar zel tur leh enkawl zui zel tur te, luidunga cheng nungchate humhalh kawnga thapui thawh chhunzawm zel turtein a chah a ni.

Khawzawl Vengthar Branch YMA buatsaih YMA Day pual thingphun hnatlangah hian member 300 vel thawk chhuakin thing tiak 1000 an phun a ni.