813/2023-2024

Hnahthial the 15th June, 2023 - YMA Bazar Branch Hnahthial chuan vawiin khan an veng khelmualah kum 50 a tlin lawmna (Golden Jubilee) hmangin bialtu MLA leh Minister ni bawk Dr.R.Lalthangliana chuan khuallian niin a hmanpui a, District AH&Vety, Hnahthial chu June ni 21, 2023 hian hawn a nih dawn thu puangin PWD Road Division pawh hawng thuai turin Chief Minister-in ruahmanna a siampui tawh thu a sawi a, June ni 29, 2023 hian Doctor thiam rual ten Hnahthial-ah Health Camp an buatsaih dawn tih a tarlang bawk.

Dr.R.Lalthangliana chuan Sawrkar hmalakna tur pawimawh hmasa ah Hnahthial District tih puitlin a dah angin theihtawpin a buaipui thu sawiin "kan Sorkar atanga thla 8-na ah kan function a, DC leh SP kan nei hman a ni" tiin Hnahthial District tih hmasawn nana hmasawnna ruhrel din chhoh hrang hrang leh District Office hlan kai tawhte a tarlang a, Chief Minister chungah lawmthu a sawi bawk a ni.

Mizo nih ti nuamtu Tlawmngaihna chu sawifiah chi a nih loh thu Health Minister Dr.Thangtea chuan sawiin "Pathianin Mizote rilruah thil hlu tak a dah leh lak hran theih loh chu tlawmngaihna niin sawifiah chi pawh a ni lova, nunpui chi niin hmangaihna, duhsakna leh lainatna nun a ni" tiin midangte nun chhan nana thisenpek te chu tlawmngaihna lanchhuah tirna a nih thu sawiin "mi an harsatna leh mangan laia dawmchhuahna leh khai chhuahna te hi tlawmngaihna a ni a, Khawhar chhungte inlenpui a, Pathian thu leh hla hmanga kan inhnem thinte hi a hlu hle a, YMA leh Zofa, Kristian kan nih anga kan vawng nung tlat hi a ropui hle a ni" a ti.

Kum zabi 21-naah hian Zofa ten thiamna tak tak luh chilh a ngaih thu sawiin Higher & Technical Educaion Minister Dr R. Lalthangliana chuan "India ramah Kerala dawta ziak leh chhiar thiam tamna dinhmun sang tak kan luah lai hian Mizorama IAS tam zawkte hi hmun dang atang rawn lut te an ni a, Mizo zingah direct a IAS lut kan awm ta mang lo" tiin All India leh Central Service-ah te lut turin tan lak a ngaih thu a sawi a, "Ram leh hnam humhalh kan tih rual hian 'ram ri' ringawt ni lovin thiamna lamah pawh kan humhalh a ngai a ni" tiin Zirtirtu ten tan lak thar a, Zirlai naupangte pawhin rilru nei taka an zir a ngaih thu a sawi bawk a ni.

YMA Bazar Branch Hnahthial-in Golden Jubilee an lawmna atan hian bialtu MLA Dr.R.Lalthnagliana hian Cheng Nuai 2 leh Dekchi lian pe in an thlanmual lungremna tur MLA fund atanging Rs, Nuai 1 a tih fel sak bawk a ni.

Tukin khan Golden Jubilee hriatrengna lungphun pawh an hruaitu hlun leh Adviser ni bawk Pu J.Lalchhuana chuan hawngin vawiin lawmna inkhawm hi Tv. J.Lalnunfela, Vice President, YMA Bazar Branch chuan kaihruaiin an Adviser Pu J.Lalnunmawia chuan Souvenir 'Sulhnu' tih lehkhabu a tlangzarh bawk a ni.