812/2023-2024

Dated Rabung the 15th June 2023: Vawiin khan Art and Culture Minister Pu R Lalzirliana chuan Rabung khua YMA Diamond Jubilee leh YMA day a hmanpui.

He ni puala Rabung Yma hall a program hmanna ahhian Minister Pu R Lalzirliana chuan thusawiin, Rabung khua YMA in Diamond Jubilee an hmang thei chu a lawmpui hle a ni, a ti a; YMA takin zonunmawi chhawm zel turin a fuih.

Minister chuan Mizoramah tun hnai ah nungchate hmuh tur an vang ta hle a,a bik takin thingtlang lam a han zin pawhin sava hmuh tur an awm mang ta lo chu a pawi takzet a ni,a ti a, Airgun scope tha tak nen sava veh chin thin chu mizo thalai ten bansan a tul takzet a ni,a ti.

Pu R Lalzirliana chuan ,'mizote chu lehkhathiam tak hnam kanni a, amaherawhchu Kan hnam nun ze mawi leh culture chhawm nun nachang Kan hrelo anih chuan Kan thiamna te a famkim tawklo a ni', a ti a, kalkhawm thalai rual te chu zo nun zia chawisang turin a chah bawk. Tun hnaia zo hnahthlak te tawrhna chungchang pawh sawiin zohnahthlak unaute buaina chu kan buaina a ni a, ensan lo a, huaisen leh tlawmngai taka chhawmdawl turin a ngen bawk.

Khualzahawm MLA Dr ZR Thiamsanga pawhin thusawiin, Mizo te chuan pun kan mamawh takzet a, pianpun campaign ngawrh lehzual a kan kalpui angai a ni,a ti. Zirna lamah pawh tan lak nasat angaih thu sawiin Mizorama hna tha te ramdangmi in an thawh zawh loh nan Mizo thalaite tan la turin a fuih bawk.

Art and Culture Minister hian Vawiin YMA Day hmanna bakah hian Vanapa thlan leh a nupui fanau te thlan leh a pasalthatpui te thlan hawnna Rabung ram,Zawlnghhak ah a nei a, he hawnna ahhian kalkhawm te chu Mizo pasaltha te huaisenna leh tlawmngaihna chhawm nung a, kawng engkim ah Mizoram venhimnan huaisenna rilru kan put a tul takzet a ni, a ti.

Rabung khua hi Khawzawl District ah awmin Village Council hruaitute tarlan dan ah chuan in 350 vel khua niin YMA hi 1963 ah a ding tana, kumin 2023 hi Diamond Jubilee kum a ni.

Vawiin YMA Day leh Diamond Jubilee lawmna Inkhawm ahhian Khuallian leh Khualzahawm hi Art and culture leh Power and Electricity officers ten an tawiawm a, Rabung Village Council members, YMA hruaitute,MUP rabung,MHIP Rabung,Kohhran hruaitute leh khaw mipui thahnem tak inkhawm ahhian an tel a ni.