811/2023-2024

Dated Serchhip, the 15^th June, 2023: Vawiin khan Chhiahtlang Kawnah YMA Day 2023 leh Kawn Veng Branch YMA, Chhiahtlang Silver Jubillee lawmna inkhawm a ruala buatsaih a ni a. Bialtu MLA leh Social Welfare & Tribal Affairs Minister ni bawk Er. Lalrinawma chuan khuallian niin a hmanpui.

He hun hmanpuitu khuallian chuan kal khawmte chu YMA Day leh Silver Jubillee chibai bukin, kum 25 na hmang thei a Pathian malsawmna an dawn avangin Chhiahtlang Kawn Vengte lawmpuina a hlan a, an kal zelna turah duhsakna a hlan a ni. Minister chuan hripui avanga hun thim an tawh laia Pathian hruaina an chanah lawmthu a sawi a, chutihlaiin hri vanga MLA Funds hmanga  hmasawnna hnathawhna kawnga an duh anga tam an kalpui theih loh phah thung tih a tarlang. YMA kumpuan thupui 'Ram leh Hnam humhalh' chu thupui pawimawh tak a ni a, sawrkar pawhin theihtawp chhuahin a bei reng a ni. Tunlaia kan sawi fo Uniform Civil Code (UCC) hi India leh MNF inremna thuthlung kalh tlat a ni a,  kan ram leh hnam tana tha lo anih avangin duhlohna thu lungrual takin  Mizoram Legislative Assembly ah pass a ni. Remna leh muanna kan neihin a hrinchhuah pakhat zinga mi Mizoram University (MZU) chu India ramah zirna in tha a ni pha ta hial hi a ropui hle a, kan ram leh hnam dinngheh zel nan he zirna in hi a pawimawh hle a ni, a ti bawk. Minister chuan khawvel hnamte zingah eitur tlakchham vanga ral ta an awm thu sawi tur a vang hle a, chuvang chuan kan ram leh hnam a din ngheh zel theih nan fa neih tam a tul tih hi thinlungah i vawng reng ang u. Pathianin khawvel hnam tinte chu tihdan phung leh hnam ziarang min pe theuhva, hei hi kan zahpui tur a ni lova, kan theih tawkin kan chawilar zawk tur a ni. Tin, Tunlai a natna hlauhawm HIV/AIDS   laka him nan Mipat hmeichhiatna kawngah YMA member te chu inthiar fihlim tlat ang u, tiin a sawm bawk a ni. Er. Lalrinawma hian Chhiahtlang Kawn Veng Branch ten 'YMA In'  an sak mek tanpui nan leh an Silver Jubillee lawmpui nan a MLA Funds atangin cheng nuaihkhat singnga (Rs. 150000) pe in, Chhiahtlang Kawn Veng Branch YMA ten an Silver Jubillee puala Booklet buatsaih chu a tlangzarh nghal bawk.

He hunah hian Tv. Lalzidinga Ralte, Branch Secretary hnen atangin report tlangpui ngaihthlak a ni a, kum 1998 khan Chhiahtlang Kawn Veng Branch YMA tih hi ding tanin kumin 2023 hi an kum 25-na a ni a, tunah hian YMA Member 612 an awm mek a ni.

He hun hi Pu H. Lalchuangliana, President, Chhiahtlang Kawn Veng Branch YMA in a kaihruai a, Chhiahtlang Kawn Veng Bialtu Pastor Rev. C.Lalsanglura'n hunserh a hmang a ni.

Chhiahtlang Kawn Veng Branch YMA te hian an kum 25-na lawmna leh YMA Day lawmna programme ah hian Chhiahtlang Kawn Veng Branch YMA hruaitu lo ni tawh te chawimawina hun te, Silver Jubillee lungphun mawi takte leh Jubillee puala  'Carnival'   hlimawm takte an buatsaih bakah tlaiah Jubillee leh YMA lawmna ruai hlim takin an kilho a ni.