810/2023-2024

Khawzawl, the 15th June, 2023: Tukin khan Horticulture Department buatsaihin Sapthei zamna thirzai, Galvanised Iron Wire (G.I Wire) semna hun Khawhai Town Hall-ah neih a ni a, he hun hi Deputy Chief Minister Pu Tawnluia chuan khuallian niin a hmanpui.

Deputy Chief Minister chuan a bial chhung Chawngtlai leh Khawhai khuaahte nasa zawka Sapthei chin tharthawh leh a nih theih nan Sawrkar Department hotute leh khawtlang hruaitute nen inrawnkhawmna zau tak neih a nih thu sawiin, a ram leilung leh boruak bakah a hralhna tur thlenga zirchian hmasak a nih hnuah hmalak a ni, a ti a. Sawrkarin kuthnathawktute chawikan leh leirem an rah theihna tura SEDP a kalpui mek thu leh hemi hnuaiah hian trade hrang hrang dah a nih thu tarlangin, ram leilung behchhana eizawnna leh intodelhna siam chu ngaihpawimawh a nih thu a sawi a. A bial chhunga khaw hrang hrangah thlai leh thei thahnem tak a bikin Tomato, Serthlum leh Lakhuihtheite tharchhuah a nih thu leh a hralhna kawngah Mizoram mai ni lo ram chhung hmun dang leh ram pawn thlenga thawn a nih thu sawiin, heng bakah hian Sapthei chin kawngah theihtawp chhuah chhoh leh mek a ni, a ti bawk.

Sapthei zamna tura pawimawh tak thirzai dap leh ngaihtuah kawngah theihtawp chhuah a nih thu sawiin, Department leh FOCUS project hmalakna kaltlanga chhawpchhuah a ni ta chu lawmawm a tih thu a sawi a, Agriculture leh Horticulture Department-te chungah bial aiawhin lawmthu a sawi a. A bial chhunga chhungkaw 200 chuangin Sapthei chin kawnga bul an tan chho tur chu phurawm a tih thu sawiin, kan ram leilung atanga sum leh pai dehchhuah hi kan mawhphurhna liau liau a ni, a ti a. Tanpuina dawngtute chu an mawhphurhna hriaa theihtawp chhuaha hlawhtlinpui tum turin a fuih a. Mizorama chin purple variety chu Sapthei tui tak leh mawi tak, a hralhna lam thlenga awlsam a nih thu sawiin, Sapthei ching turte chu phur tak leh taima taka thawk turin a chah bawk.

Sawrkarin kuthnathawktute dinchhuahna turin SEDP a ruahman thu leh Covid-19 in harsatna namenlo a thlen avangin kum 2 chhung hmalak a rem loh thu leh ruahman ang pawha hmalak chak a nih theih loh thu sawiin, tunah chuan SEDP pawh kalpui chhoh mek zel a lo ni ta a, SEDP phase I kan thlang zo tawh a, mi 60,000 tan first leh second installment kan sem zo tawh a, third leh fourth instalment leh a tul angin Rs 3,00,000 thleng pawhin kan inpe dawn a ni, a ti a. SEDP Phase II beneficiary pawh kan thlang fel leh tawh a, tanpuina first installment pawisa pawh kan pe leh thei tep tawh a ni, a ti a. Mipuite chu mahni hmazawn theuha mawhphurhna tlate hlen chhuah tum tur leh, an tana sawrkarin program pawimawh tak tak a duante tihlawhtlingtu nih tum theuh turin a chah a ni.

Horticulture Department tarlan danin Khawhai khuaah hian kum 2003 atangin tih tak taka Sapthei chin tan a ni a, hemi kum hian Horticulture Department hmalaknain chhungkaw 200 in bul an tan a. An hlawhtlina an hlawkpui chhoh viau laiin, kum 2006 atangin natna avang leh a hralhna lama harsatna an tawh chhoh avangin mi tam takin an chhunzawm hleithei ta lova, chutih laiin tun thleng hian chhungkaw thum chuan beidawng lovin an la ching reng a ni. A zamna thirzaite a mawih chhiat tawh avangin pandal system chuan an ti thei tawh lova, fencing system-in an ching a. Sapthei tharte hi Kg ah Rs 70-80 in an hralh reng a ni.

Vawiin hian Sapthei zamna tur G.I Wire quintal 333 (666 Rolls), Rs. 33,30,000/- man sem chhuah a ni a. Heng G.I Wire-te hi Horticulture Department leh IFAD FOCUS convergence hnuaia hmalakna niin beneficiaries 111 te hnenah sem a ni a, beneficiary pakhat zelah quintal 3 (Coil 6) theuha sem a ni.

Sapthei zamna tur thirzai semna inkhawm hi Pu Lalnunpuia, DHO Khawzawl chuan kaihruaiin kalkhawmte lawmna thu a sawi a. Upa Rohlupuia Ralte in hunserh a hmang a. Horticulture Director Pu C.H Lalmuanpuia'n thu a sawi bawk a. Pu Daksiamliana, VCP Khawhaiin lawmthu sawiin hun hman hi a khar a ni.

Tukin vek khan Deputy Chief Minister Pu Tawnluia, Tuichang AC bialtu ni bawk chuan Khawhai Field laih mek a tlawh bawk a. Bialtu MLA hi Khawhai Village Council member-te leh Games & Sports Association hruaitute'n an tawiawm a ni.

Khawhai Field thar tur hi Pu Tawnluia ngenna angin CSR Fund atanga laih tan a ni a, a chhunzawmna tur atan hian fund awm thei ang angte dap zel a ni a. Khawhai Field thar tur laih mek hi tun dinhmunah a dung metre 90 leh a vang metre 68 laih tawh a ni a, July thla chhung hian laih zawh hman beisei a ni.