809/2023-2024

Mumbai 15th June, 2023 : India rama a vawi khatna atan MIT-School of Government (SOG)buatsaih, National Legislators' Conference(NLC) hmasa ber chu vawiin atangin Mumbai-ah țan a ni a. Conference hawnna hi Grand Hyatt Hotel conference hall ah neih niin  Lok Sabha Speaker lo ni tawhte, India ram state hrang hrang Assembly Speaker leh Council Chairman te, Central leh State hrang hrang sawrkar mi pawimawh tak takte an tel a.  Mizoram atangin Assembly Speaker Pu Lalrinliana Sailo pawh NLC hawnna ah hian a tel a ni.

Conference hawnna programme hi MIT- SOG  Founder leh CEO ni bawk, Pu Rahul V. Karad-an a kaihruai a. Conference thlengtu Maharashtra sawrkar aiawhin Assembly Speaker Pu Rahul Narwekar-an state hrang hrang atanga conference hmang tura kal khawmte chu lawmna thu sawiin NLC vawi khatna Mumbai khawpuia buatsaih a ni chu lawmawm a tih thu a sawi a. Maharshtra state lo indin chhoh dan leh hruaitu hmasa ten India rama state changtlung leh pawimawh ber pakhat ni tura hma an lo lak dan te tarlangin India ramah parliamentary democracy a hlawhtlin a, hma a sawn zelna turin legislators ten inpawh taka sawihona leh zirhona an nei tur chu a phurawmin hei hian rah țha a chhuah ang tih a beisei thu a sawi a. Hetiang hmalakna hi a thlawp tak zet tih a sawi bawk.

Vawiina NLC hawnna functionah hian India sawrkara nihna pawimawh tak tak chelh tawhte zingah Lok Sabha  Speaker lo ni tawh, NLC Patrons ni mek bawk, Pu Shivraj Patil,  Dr.Manohar Joshi, Dr. Meira Kumar leh Pi Sumitra Mahajan te an tel a. Tibet Prime Minister in exile Dr.Lobsang Sangay pawh a tel bawk a ni. Pi Sumitra Mahajan Pu Shivraj Patel leh Dr.Meira Kumar ten thusawina hun an hmang a. State/UT hrang hrang Speaker/Chairman te hnenah khawvel ram hrang 30 Constitution pek țheuh a ni.

NLC hi Jio World Convention Centre, Bandra ah ni 3 chhung neih chhunzawm a ni dawn a. Hetah hian India ram state hrang hrang atanga legislator rual ten mahni ram leh ziarang inhriat tawnna te, ngaihdan thawh khawm leh sawihona hun te, democracy  țhan zelna tur atana pawimawh te, rorelna țha nei tura legislator te hmalakna tur te, zirna lama hmasawnna rualkhai zawka kalpui dan turte, sum leh pai dinhmun țhanna atana hmalakna tur pawimawh leh area hrang hranga hmasawnna turte  an sawiho ang a. MIT mithiam rualte nen group hrang hrangah ințhen darhin ngaihdan inhrilh tawnna te,  state kalphung țha zirhona leh sawihona in hun an hmang dawn a ni. Conference ah hian India ram state hrang hrang leh Commonwealth ram hrang hrang atangin Assembly Speaker leh Chairman te, Legislators rualte leh official pawimawh țhahnem tak sawm an ni a. Mizoram atangin Speaker Pu Lalrinliana Sailo leh political party hrang hrang aiawh MLA 6 - Pu K.T Rokhaw, Pu Nihar Kanti Chakma, Er.H.Lalzirliana,  Dr.K.Pachhunga, Dr.Vanlalthlana leh Pu B.D Chakma te an tel a. Official aiawhin Pu Lalhmahruaia Zote, Commissioner & Secretary leh Pi P.B.Lianthangpuii Jt.Director, I&PR te bakah Assembly Secretariat atangin officer leh staff 4 an tel bawk a ni.