808/2023-2024

Khawzawl, the 14th June, 2023: Vawiin chawhnu dar 3 khan Nikuala Hall Chawngtlaiah Horticulture Department buatsaihin Sapthei zamna tur thirzai Galvanised Iron Wire (G.I Wire) semna hun hman a ni a, he hun hi Deputy Chief Minister Pu Tawnluia chuan khuallian niin a hmanpui a ni.

Khuallian Pu Tawnluia chuan Horticulture Department lamah Sapthei zamna tura hmalakna scheme a awm tawh loh thu leh sapthei zamna tur ngaihtuah kawngah theihtawp chhuaha Department hotute nena ngaihtuahna senho a nih thu sawiin, a tih theih hram dan ngaihtuah fe hnua a hlawhtlinna hmuh a ni leh, Sapthei chingtute hnen a thleng thei ta chu lawmawm tiin, Pathian malsawmna a nih thu a sawi a. Mipuite hmasawnnan leh ei leh bara kan intodelhna tura hetianga ruahmanna a lo hlawhtling ta hi a lawmawm ka ti tak meuh a ni, a ti a. Chawngtlai ram leilung leh boruak chu Sapthei chinna atana tha a ni tih leh, sapthei market a tha tih Department hotute'n an hrilh thu sawiin, hengte hian beiseina sang tak min pe a, uluk leh ngun taka Department hotute nen ngaihtuahna kan hman hnuin FOCUS atangin thirzai leina tur sum hi kan nei thei ta a, ka lawm takzet a ni, a ti bawk.

Deputy Chief Minister chuan Sawrkarin kuthnathawktute dinchhuahna turin SEDP a ruahman thu leh Covid-19 in harsatna namenlo a thlen avanga ruahmanna ang pawha hmalak chak a nih theih loh thu sawiin, tunah chuan SEDP pawh kalpui chhoh mek zel a lo ni ta a, SEDP phase I kan thlang zo tawh a, first leh second installment kan sem zo tawh a, third leh fourth instalment leh a tul angin Rs 3,00,000 thleng pawhin kan inpe dawn a ni, a ti a. SEDP Phase II beneficiary pawh kan thlang fel leh tawh a, tanpuina pawisa pawh kan pe leh thei tep tawh a ni, a ti bawk.

Pu Tawnluia chuan sawi chhunzawmin Sapthei, Lakhuihthei, Tomato, Dragon Fruit leh thlai dang hralhchhuah tham tharah sawrkarin a hralhna tur a ngaihtuah pui zel dawn thu pawh sawiin, kuthnathawktute chu hemi kawnga harsatna an tawh chuan sawkara thlen zel turin a chah a. Sapthei thar chhuah kawngah Chawngtlai chu Mizorama hmahruaitu leh hemi avanga hriat hlawh a nih theih thu sawiin, theihna an neihte chhawr tangkaia taima taka thawka hlawhtlinpui ngei turin kuthnathawktu kalkhawmte a fuih a ni.

Horticulture Director Pu C.H Lalmuanpuia pawhin thu sawiin, Chawngtlai khuaah hian kum 1995 atangin Sapthei chin tan a ni a, a hralhna tur market leh hri avangin hun engemawchen chawlhsan a ni, a ti a. Bialtu MLA Pu Tawnluia, Deputy Chief Minister thahnemngaihna avanga sapthei chin tharthawh leh a ni chu lawmawm a tih thu sawiin, Sapthei chin nana a hautak bera ngaih a zamna tur thirzai a ngaihtuah sak chu lawmawm a tih thu a sawi bawk a. Thar chhuah a that phawt chuan Sawrkar kaltlangin a hralhna tur market-ah buaina a awm dawn loh thu a sawi bawk.

Thusawitu dang Khawzawl DC Pu K.Lalrohlua chuan kuthnathawktute hmakhua ngaia bialtu MLA hmalakna fakawm a tih thu sawiin, kuthnathawktute chu an thil dawnte tangkai taka hmanga hlawhtlinna chan tum theuh turin duhsakna a hlan a ni.

Vawiin hian Sapthei zamna tur G.I Wire quintal 330 (660 Rolls), Rs. 30,30,000/- man sem chhuah a ni a. Heng G.I Wire-te hi Horticulture Department leh IFAD FOCUS convergence hnuaia hmalakna niin beneficiaries 110 te hnenah sem a ni a, beneficiary pakhat zelah quintal 3 (Coil 6) theuha sem chhuah a ni.

Tun dinhmunah Chawngtlai khuaah hian Sapthei chingtu Association member 173 an awm mek a. Chawngtlai khua hian kartin Sapthei Quintal 10 vel an hralhchhuak reng a, Kg ah Rs. 50-70 te'n an hralh mek a ni. Chawngtlaiah hian Sapthei hi kumtluana a rah theih laiin, a thar runpui (peak season) hi kum khatah vawi thum, March to June, August thla leh December thlate an ni a. Kum 2006 hnu lamah hian a natna vang leh a hralhna lamah harsatna an tawh chhoh tak avangin mi tam zawkin Sapthei chin an chawlhsan a. Chutih laiin Chhungkaw 30-40 chuan chawlhsan lovin an la chhunzawm reng a. Sapthei hralhnate a that chhoh leh tak zelah chuan kum 2020 ah phei chuan Sapthei ching hi chhungkaw 78 lai an tling chho leh ta a ni.

Sapthei zamna tur thirzai semna inkhawm hi Pu Lalnunpuia, DHO Khawzawl chuan kaihruaiin kalkhawmte lawmna thu a sawi a. Rev. JH. Palala'n hunserh hmangin Pu H.Lalremsanga, VCP Chawngtlaiin lawmthu sawiin hun hman hi a khar a ni.