807/2023-2024

Aizawl, June ni 14, 2023: Lengpui Airport inrelbawlna leh venhimna chungchanga thu pawimawh hrang hrangte ngaihtuahin vawiin khan Chief Minister Pu Zoramthanga hovin CM Conference Hall-ah meeting neih a ni.

Vawiin meeting-ah hian kumin February ni 11 a Chief Minister kaihhruaina hnuaia meeting lo neih tawh leh April ni 14 a Ministry of Civil Aviation Secretary hova meeting lo neih tawh bawhzuina leh hmabak la awmte sawiho a ni a. Chung zingah chuan Lengpui Airport hungna siam tur chungchang leh survey neih chungchanga hmalakna te, security bungrua thuam that te, CCTV system tihchangtlun te, post thenkhat a thawktu indaihlohna chungchanga hmalak dan te, training pek leh thu pawimawh dang sawiho a ni a. Heng bakah hian Mizoram chhim lama Green Field Airport siam tur chungchanga hmalakna te, Tuirial Airfield siamthat leh hmun hrang hranga helipad te tihchangtlun chungchangte sawiho a ni bawk.

Vawiin meeting-ah hian Chief Secretary Dr. Renu Sharma leh Finance, GAD, Home, DP&AR, Revenue, Civil Aviation leh department dang atang te in hotute an tel a ni.