806/2023-2024

Champhai, the 14th June, 2023: Khawvel hmun dangte rualin vawiin khan Blood Bank, District Hospital Champhai leh Association for Voluntary Blood Donation (AVBD), Champhaite tangkawp buatsaihin World Blood Donor Day, 2023 chu 'Give Blood, Give Plasma - Share Life, Share Often' tih thupui neia hman a ni a, he hun hi District Bawrhsap Pu James Lalrinchhana chuan khuallian niin a hmanpui a ni.

Khuallian Pu James Lalrinchhana chuan Champhaia World Blood Donor Day, 2023 hun hman a ni leh he hun pawimawh tak hmanpui tura sawm a ni chu lawmawm a tih thu sawiin, midang nunna chhan nana thisen pe thintute chu fakawm a tih thu leh chawimawi tlak an nih thu a sawi a. Midang nun chhan nana thisen pe thei tura taksa hriselna ngaih pawimawh a tul thu sawiin, taksa tichhe thei ruihhlo lakah kan fihlim a ngai a, zonun zemawi leh kohhran min zirtir zawng zawngte kan zawm hi hriselna atana pawimawh a ni a ti a. Kalkhawmte chu pe theitu nih tum tura fuihin, pawl hrang hrang leh kohhran, department thawktu zawng zawngte chu thisen pek kawnga tangruala thawkho zel turin a chah bawk.

Vawiin World Blood Donor Day, 2023 hmanna hunah hian pawl leh mimal thisen pe thate chawimawina hlan an ni a. Chawimawina hlan zingah hian mipa zinga Champhai District-a mimal thisen pe tam ber thisen Unit 84 petu PC Lalchuangkima, Unit 47 petu C.Zoremsiama leh Unit 40 petu Lalmuanzova te chawimawina thuziak hlan an ni a. Hmeichhiaah F.Lalchhandami chuan thisen pe tam berin Unit 31 a pe a, Chawngzikpuii'n dawtin thisen Unit 29 a pe a, F.Lalthanpuii chuan Unit 20 pe tawhin pathumna a ni bawk a, an vai hian chawimawina thuziak hlan an ni bawk a ni.

Champhi District chhunga YMA Branch hminga thisen pe thate hnenah chawimawina thilpek hlan ni bawkin Champhai Bethel, Leisenzo, Khawbung leh Samthang Branch YMA te chawimawina pek an ni a. Kohhran hrang hrang atanga thisen pe tha zingah AYF Champhai North Branch, AYF Champhai South Branch, PYD (Northeast) Bethel Bial, TKP Bethel Bial leh Zotlang North Branch KTP te hnenah chawimawina thilpek hlan an ni bawk a. Zirna In zinga thisen pe tha Govt. GM HSS, Govt. Champhai College leh Govt. Khawzawl College-te hnenah hlan a nih bakah Department anga thisen pe awm chhun Police Department hnenah chawimawina hlan a ni a, heng bakah hian Chhura Hmun Welfare, Bethel Vengte chawimawina hlan an ni bawk.

World Blood Donor Day, 2023 hi MPSC Hall, Govt. Gandhi Memorial Higher Secondary School Champhaia neih hi Dr. Krossnunpuii, Blood Bank Officer (BBO) District Hospital Champhai chuan kaihruaiin Rev. K.Laltlanhlua'n hunserh a hmang a. District Medical Superintendent (DMS) Dr. Zatluanga, President, AVBD Champhai leh Sub-Hqrs YMA Champhai President Pu F.Lalrinmuana te'n thu an sawi bawk a. Pu PC Lalchuangkima, Asst. Secretary, AVBD Champhaiin lawmthu sawiin hun hman a khar a ni.