805/2023-2024

Aizawl 14th June 2023 : Vawiin chawhma khan Environment, Forest & Climate Change Minister, Pu T.J. Lalnuntluanga chuan Integrated Development of Wildlife Habitat (IDWH) hnuai atanga cheng Nuai 30 hmanga sak North Hlimen a Forest Rest House chu a hawng.

Hawnna inkhawm ah hian EF&CC Minister Pu T.J. Lalnuntluanga chuan Mizoramin hun khirh leh harsa tak a tawn laiin sawrkar chuan a theih ang angin hmasawnna hna a thawk a, sawrkar leh department hotute, khawtlang hruaitute thawhhona tha tak avanga North Hlimen khuaa Forest Rest House changtlung leh tha tak peihfel a ni ta chu lawmawm a tih thu a sawi a. Ram rawngbawlna a ni emaw, mahni hnathawhna kawng engkimah neitu thinlung pua thawh a nih chuan hmasawnna hi a tak a hmuh theih a ni thin a ti.

Pu Lalrinsanga Serlui bialtu MLA pawhin thusawiin, Mizoram sorkar hmalakna zarah a bial chhungin hmasawnna tam tak a hmu tawh a, ramri depa awm an nih angin EF&CC leh Transport department changtu Minister in hmasawnna chi hrang hrang Serlui bial tana a chhawp chhuahsak thin chu lawmawm a tih thu tarlangin, bial mamawh hrang hrang an thlen te pawh lo ngaih pawimawhsak chhunzawm zel turin Minister chu a ngen a ni tih a sawi bawk.

North Hlimen a Forest Rest House hawn thar hi Mizopa chhiara chhawng hnih a sak niin, VIP room pakhat, ordinary room pahnih leh khum 6 awmna dormitory pakhat awmin, eirawngbawlna choka tha tak siam a ni bawk.

Minister hian North Hlimen Forest Rest House hawnna inkhawm a hman zawh hnuin Tuirial (NEEPCO leh Pualreng Wildlife Sanctuary inkar) tuikawng sial dan tur a en nghal a, Minister hi Serlui bialtu MLA, Pu Lalrinsanga Ralte, Er. R. Lalrammawia, Director Transport; Pu PC Laltanpuia, MFS, DCF (W), Pu Lalnunzira, IFS, DFO, Darlawn leh mi pawimawh dang ten an tawiawm a ni.