804/2023-2024

Siaha, the 14th June, 2023: Vawiin chawmhma dar 11:00Am khan DMS Hall, District Hospital Siaha-ah Association for Voluntary Blood donation, Siaha District buatsaihin World Blood Donor Day,2023 hi hman a ni a. Dr. C. Lalrosanga, Medical Superintendent, District Hospital Siaha chuan khuallian niin programme a hmanpui.

World Blood Donor Day puala hun hman hi Pu Lalnunkima, President, Association for Voluntary Blood Donation, Siaha chuan kaihruaiin, khuallian Dr. C. Lalrosanga, Medical Superintendent, District Hospital Siaha chuan thu sawina hun a hmangin, World Blood Donor Day chu thisen pe thintute puala hman a nih thu a sawi a, Dam lo, thisen mamawhtute tana thawk thin Association for Voluntary blood donation te hna thawh chu ropui a tih thu sawiin, he pawl hi mamawh tak tak leh mangan tawpa hriatfiah chi a ni. Blood bank mualpho loa a awm theihna leh licence pawh cancel a nih lohna chhan chu an hmalakna vang leh tlawm ngaia thisen pe thintute vang a ni a, District Hosptal enkawltute ka nih ang pawhin lawm thu ka sawi a, kan technician leh blood bank a thawktute zawng zawng hi – khaw chhia leh kawng chhiain a dan theih loh – kan Pasaltha te an ni a, an chung lawmthu ka sawi bawk a ni, a ti.

Sawi zelin, Mi thiamte’n Oxygen te chu an siam chhuak thei a, Lungphu tha lo pawh battery hmangin an phut tir a, ri hriatna nei tawh lo te pawh khawl hmangin ri hriatna an pe a, mit naute thlengin an siam chhuak tawh a ni. Mi hring thisen erawh a composition zawng zawng leh a inpawlh dan zawng zawng hre vek tawh mah se la vawiin thleng hian mi thiamte hian an la siam chhuak thei lo a, petu kan awm a ngai a ni. Tun lai khawvelah thisen pe thei lo an tam em em tawh a, thisen pe thei nih hi a la hlu telh telh dawn a, mamawhna pawh a sang telh telh dawn. Vawiina rawn kalkhawmte pawh hian thisen pe thei tura tan kan lak zel atul takzet a, vawiina kan pe thei lo a nih pawhin rem chang danga pe turin kan insawm a ni, a ti bawk.

Khuallianin thu a sawi zawh hian Dr. V. Dochai, Blood Bank Officer, Siahain thisen pek a pawimawhna leh kan din hmun tlangpui a sawi a, Pu C. Rodinliana, Programme Officer, NSS GHSS Unit pawhin NSS hmalakna leh thisen pek tulnate a sawi bawk.

Vawiin inkhawma hun tawi hmannaah hian Rev P. Riabi, Chaplain, District Hospital, Siaha chuan hunserh hmangin Nl. H. Lalruatpari’n kalkhawmte zai mawi takin a awi hlawm a ni.

Vawiina World Blood Donor Day,2023 hmanna hi National Service Scheme, Government Higher Secondary school, Siaha te nen tangtlanga buatsaih a ni a, programme zawh hnu hian thisen pekin chhunzawm nghal a ni a, unit 24 hmuh a ni.

Vawiina thisen petute chu –

1)Mi mal – 3

2)NCC – 2

3)Assam Riffle – I

4) NSS – 18, an vaiin mi 24 an ni a, mipa 20 leh hmeichia – 4 an ni.