803/2023-2024

2023 Nikir thla ni 14: Mizoram State Transport Authority (STA)-in Mizoram puma passenger phur lirthei hman man a ruahman ennawnna turah District hrang hrangin an duh dan rawtna thlen tura a tih angin, vawiin khan Lawngtlai Bawrhsap charge la mektu Pu Abraham Beirazi Khithie hovin Lawngtlai Press Club-ah Lawngtlai District-in STA-a rawtna a thlen tur chu ngaihtuah ho a ni.

Pu Abraham Beirazi Khithie chuan passenger phur chi lirthei hrang hrang - auto rickshaw, taxi leh maxi cab te hman man chu mi rethei ber berte nghawng a nih avangin ngunthluk taka ngaihtuahna seng a, rawtna siam turin member kal khawmte chu a chah a. Meeting thu tlukna chu hman nghal tur ni lovin, Lawngtlai District rawtna anga STA-a thlen tur chauh a ni a, district hrang hrang aṭanga rawtna lut hmangin STA chuan thu tlukna a la siam leh dawn a ni, a ti.

He hunah hian Additional Superintendent of Police, District Transport Officer leh sawrkar official dangte bakah, passenger phur lirthei neitu leh khalhtu pawl hrang hrang ai awhte, VC Association, Consumer Association, District MJA leh tlawmngai pawl hrang hrang ai awhte an tel a. DTO Pu Denny Lalchhuanawma chuan STA rate hman lai chu pharhin, thlir ho a ni a. Passenger phur lirtheite tana hloh awm lo tur leh mipuite tan pawha na lo tur ngunthluk taka ngaihtuah a nih hnuah, a kilometre bi-a auto rickshaw, taxi leh maxi cab hman man atana STA-a rawtna thlen tur chu pawm a ni.

He hunah hian Lawngtlai District chhunga auto rickshaw leh taxi service mek dinhmun thlir ho niin, permit dil belh a ṭul leh ṭul loh ngaihtuah ho a ni a. Uluk zawkin District dinhmun zir chian leh rih phawt ni se, STA-ah zir chianna report chu theh luh ni se, tih a ni.